ხელოვნება და კულტურა

„ის იყო ოპერის ქალღმერთი, განსაკუთრებული პიროვნება და მომღერალი“-ცისანა ტატიშვილს 82 წელი შეუსრულდებოდა

ლეგენდარული პრიმადონა შარშან ინსულტის დიაგნოზით გარდაიცვალა. ქართველ საოპერო დივას, 82 წელი შეუსრულდებოდა.

ცისანა ტატიშვილი 1963 წლიდან თბილისის ოპერისა და ბალეტის სახელმწიფო თეატრის სოლისტი იყო. 38 წლის განმავლობაში მღეროდა როგორც სოპრანოს, ისე მეცო სოპრანოს რეპერტუარს. გამოდიოდა მოსკოვის დიდი თეატრისა და პეტერბურგის მარიას თეატრის სცენებზე. გასტროლებს მართავდა ევროპის მრავალ ქალაქში: ვილნიუსში, რიგაში, კიშინოვში, კიევში, ოდესაში, მინსკში, სოფიაში, ბუდაპეშტში, ვარშავაში, ბერლინში (დოიჩე ოპერა, კომიშე ოპერა), ბონში, მიუნჰენში, კიოლნში, ბაზელში, ათენში, ლისაბონში, ლონდონში, პრაღაში, ვენაში, ბუსეტოში.

ქართველ სოპრანოს, თბილისთან დამეგობრებული ქალაქების საოპერო თეატრების სცენებზე ნამღერი აქვს ფართო ევროპული რეპერტუარი. ცისანა ტატიშვილი, რ. შტრაუსის “სალომეას” პარტიის ერთ-ერთი პირველი და საუკეთესო შემსრულებელია ყოფილ საბჭოთა კავშირში, ამიტომ მსოფლიო მუსიკის ენციკლოპედიაში, მონსერატ კაბალიესთან და ბირგიტ ნილსონთან ერთად, სალომეას შემსრულებელთა მსოფლიოს საუკეთესო სამეულშია შესული.

თბილისის ოპერისა და ბალეტის სახელმწიფო აკადემიური თეატრის წინ, ცისანა ტატიშვილის სახელობითი ვარსკვლავი 2010 წელს გაიხსნა.

„როცა ჩვენ დარბაზში ვისხედით და ვუსმენდით, ვუსმენდით ნამდვილ სასწაულს. ისე ზემოქმედებდა ჩვენზე- კოლეგებზე და ზოგადად მსმენელზე, ისე აღგვაფრთოვანებდა ყველას მისი ხმა და მოქმედება სცენაზე, რომ გვინდოდა გვეყვირა და გვეკივლა. ცისანა იყო ოპერის ქალღმერთი. ის იყო განსაკუთრებული, განსაკუთრებული პიროვნება, მომღერალი და ფენომენალური ხმის პატრონი“,- იხსენებს საქართველოს სახალხო არტისტი თამარ გურგენიძე.

თბილისის საპატიო მოქალაქე, ბრწყინვალების საპრეზიდენტო ორდენის კავალერი, ღირსების ორდენოსანი, შოთა რუსთაველისა და ზაქარია ფალიაშვილის სახელობის სახელმწიფო პრემიების ლაურეატი, სსრკ სახალხო არტისტი, საქართველოს სახალხო არტისტი, შვეიცარიის საპატიო ორდენის კავალერი, ლეგენდარული ქართველი სოპრანო ცისანა ტატიშვილი დიდუბის მწერალთა და საზოგადო მოღვაწეთა პანთეონშია დაკრძალული.

Facebook Comments

ავტორის შესახებ

Info Postalioni