ბიზნესი

მერია ავტობუსების დაგვიანებით შემოყვანის გამო, კომპანიას დააჯარიმებს

თბილისის მერია ავტობუსების დაგვიანებით შემოყვანის გამო კომპანია TEGETA TRUCK AND BUS-ს დააჯარიმებს. საქმე ეხება მერიის მიერ შესყიდულ MAN-ის 90 ავტობუსს, რომლის ნაწილიც, 50 ერთეული, კომპანიას მერიისთვის ჯერ არ მიუწოდებია. მიწოდების ვადა ივნისში ამოიწურა.

როგორც ჟურნალისტებს თბილისის მერის მოადგილემ, მაია ბითაძემ განუცხადა, ნებისმიერ გადაცილებულ თვეზე კომპანია ჯარიმას იხდის. ჯარმის ოდენობა მას შემდეგ დაითვლება, რაც კომპანია ავტობუსებს მერიას მიაწოდებს.

„თუმცა, აუცილებლად მოგვაწოდებენ ყველა იმ ავტობუსს, რომელიც შეკვეთილია. შეიძლება კომპანიის მხრიდან იყოს შეყოვნება როგორც მოწოდების, ასევე ავტობუსების დამზადების თვალსაზრისით. ხშირად მომწოდებლები ვერ ასწრებენ თავის დროზე მოწოდებას. სამწუხაროდ, გვიწევს დაჯარიმება მომწოდებელი კომპანიის, მაგრამ საბოლოო ჯამში, სატრანსპორტო ერთიანი სქემის გაშვება არ დაგვიანდება. იცით, რომ ავტობუსებთან დაკავშირებით ძალიან დიდი გეგმები გვაქვს. ეს არის პირველი პარტიის მეორე ნაკადი, რომელსაც ვღებულობთ. მომდევნო თვეებში კვლავ გამოცხადდება ტენდერები, მათ შორის ელექტროავტობუსების შეძენაზე. ჩვენ ავტობუსების ჩანაცვლების მთლიან პროგრამას დავასრულებთ 2021 წელს მაშინ, როდესაც მთლიანი ინფრასტრუქტურა ავტობუსებისთვის ცალკე სავალი ზოლისა და სატრანსპორტო სქემის შეცვლასთან დაკავშირებით იქნება დასრულებული. ჩვენ ორ წელიწადში მთლიანად განახლებული სატრანსპორტო ინფრასტრუქტურა გვექნება“, – განაცხადა ბითაძემ.

მისივე თქმით, თბილისს ორ წელიწადში დაახლოებით, 1 000-მდე ავტობუსი ეყოლება.

Facebook Comments