საზოგადოება

GWP: თბილისს მაღალი ხარისხის სასმელი წყალი მიეწოდება

თბილისში სასმელი წყლის ხარისხი უსაფრთხოა და სრულად შეესაბამება როგორც ეროვნული რეგლამენტის დადგენილ მოთხოვნებს, ასევე ჯანდაცვის მსოფლიო ორგანიზაციის რეკომენდაციებს- ამის შესახებ ინფორმაციას „ჯორჯიან ვოთერ ენდ ფაუერი“ ავრცელებს.

კომპანია სტუდია „მონიტორის“ მიერ რადიო „თავისუფლების“ საშუალებით გავრცელებულ სიუჟეტთან დაკავშირებით მოსახლეობას ზედაპირული წყლებიდან ნედლი წყლის მოპოვებისა და სასმელ წყლამდე დაყვანის პროცესს განუმარტავს.

„საწყის ეტაპზე „ჯორჯიან უოთერ ენდ ფაუერი“ ნედლ წყალს მოიპოვებს მდინარე არაგვიდან, ბულაჩაურის, ნატახტრის, მისაქციელის წყალშემკრები აუზებიდან და თბილისის წყალსაცავიდან (თბილისის ზღვიდან).

რაც შეეხება თბილისის წყალსაცავს-ნედლი წყლის წყალაღება ხდება ღრმაღელეს საფილტრე სადგურის მიმდებარედ, მხოლოდ სანიტარული ზონებით დაცულ ტერიტორიაზე, 10 მეტრის სიღრმიდან. GWP-ი წყალაღების წერტილებიდან მოპოვებული ნედლი წყლის ანალიზს ახორციელებს ზედაპირული წყლების ტექნიკური რეგლამენტის შესაბამისად როგორც ქიმიურ, ასევე მიკრობიოლოგიურ მაჩვენებლებზე. 

შემდეგ ეტაპზე ზედაპირული წყლებიდან მოპოვებული ნედლი წყალი სასმელ წყლამდე დასაყვანად უწყვეტად გადის ტექნოლოგიური დამუშავების სრულ ციკლს: დალექვას, ფილტრაციას, წყლის გაუსნებოვნებას. 

პროცესის ბოლო ეტაპზე, სასმელი წყლის ხარისხი მუდმივად, 24 საათის განმავლობაში, 30 წუთიანი შუალედებით მოწმდება ქიმიურ და მიკრობიოლოგიურ პარამეტრებზე. შემოწმებას GWP-ის აკრედიტირებული ლაბორატორიები ახორციელებენ, რის შემდეგაც თბილისის მოსახლეობას მაღალი ხარისხის სასმელი წყალი უწყვეტ რეჟიმში მიეწოდება”-ნათქვამია კომპანიის მიერ გავრცელებულ ინფორმაციაში.

Facebook Comments

ავტორის შესახებ

Info Postalioni