არჩილ თალაკვაძე: ილუზია არ უნდა გვქონდეს, რომ ოპოზიცია სპეკულაციას არ გააგრძელებს

“რა თქმა უნდა არ უნდა გვქონდეს იმის ილუზია, რომ ოპოზიციის ნაწილი ხვალ, ზეგ არ გააგრძელებს სპეკულაციას და დესტრუქციულ პოლიტიკას. მაგრამ, რა თქმა უნდა ეს ვერ იქნება მომავლის განმსაზღვრელი”, – ამის შესახებ პარლამენტის თავმჯდომარემ არჩილ თალაკვაძემ ბიუროს სხდომაზე ახალ საარჩევნო მოდელთან დაკავშირებით საუბრისას განაცხადა.

პარლამენტის თავმჯდომარე ირწმუნება, რომ მმართველი გუნდისთვის პრიორიტეტულია არა თანამდებობები, არამედ ქვეყნის მომავალი, რაც საარჩევნო მოდელთან დაკავშირებით გუშინდელ შეთანხმებას დაედო საფუძვლად.

“ჩვენ ამ წლების განმავლობაში არაერთხელ დავამტკიცეთ, რომ სკამები და თანამდებობები არ არის ჩვენთვის მთავარი , ჩვენთვის მთავარია ქვეყანა, ჩვენი საზოგადოება და  ქვეყნის მომავალი. სწორედ ეს იყო ძირითადი სახელმძღვანელო გუშინაც, როდესაც მოლაპარაკებისმაგიდასთან ვიყავით.

ვისაც დაავიწყდება, ან ექნება განსხვავებული გაგება, თუ რაზე მოხდა შეთანხმება, ამ დოკუმენტს უნდა ჩახედოს, სადაც წერია ცალსახად , თუ რა არის შეთანხმების პირობები.

 რა თქმა უნდა ჩვენ არ უნდა გვქონდეს ილუზია, რომ ოპოზიცია ხვალ, ზეგ არ გააგრძელებს ახალი საკითხების ძებნას, მათი ნაწილი სპეკულაციებს, იმ დესტრუქციულ პოლიტიკას, რომელსაც აქამდე ახორციელებდნენ, მაგრამ რა თქმა უნდა ეს ვერ იქნება ვერანაირი მომავლის განმსაზღვრელი.

ჩვენ გვსურს ეკონომიკური ზრდის გაგრძელება, უსაფრთხოების განმტკიცება, გაწევრიანება ევროკავშირსა და ნატო-ში, ჩვენი კულტურული მემკვიდრეობის დაცვა, შენახვა და მისი განვითარება, პროგრესის გაგრძელება. თუ ვინმეს სურს უკან დაბრუნება, ამ პროგრესის შეჩერება და თუ ვინმეს აინტერესებს გუშინდელი დღე, რა თქმა უნდა ჩვენი მოქალაქეები არჩევნებზე მიიღებენ გადაწყვეტილებას ხვალინდელ დღეზე ორიენტირებულ პარტიასა და გუშინდელ დღეზე ორიენტირებულ პოლიტკურ ძალებს შორის. არავის მიცემთ საშუალებას, საარჩევნო ყუთის გვერდის ავლით რაიმე უპირატესობა მოიპოვოს, ეს შეუძლებელია! გუშინდელმა შეთანხმებამ ეს კიდევ ერთხელ განამტკიცა”, – აღნიშნა არჩილ თალაკვაძემ.

ცნობისთვის, საარჩევნო სისტემასთან დაკავშირებით ხელისუფლება და ოპოზიცია შეთანხმდა. 2020 წელს საპარლამენტო არჩევნები 120/30-ზე მოდელით და 1%-იანი ბარიერით ჩატარდება. ასევე იქნება 40%-იანი ჩამკეტი მექანიზმი- ანუ, პარტია, რომელიც 40%-ზე ნაკლებს აიღებს, არ ექნება საპარლამენტო უმრავლესობა და ვერ შეძლებს მთავრობის დაკომპლექტებას.

Facebook Comments
%d bloggers like this: