ჯანდაცვის მინისტრი სამედიცინო პერსონალს მადლობას უხდის

საქართველოს ჯანდაცვის მინისტრმა ეკატერინე ტიკარაძემ აჭარის საზოგადოებრივი მაუწყებელის ეთერში სამედიცინო პერსონალს კორონავირსუსის გავრცელებასთან ბრძოლისთვის მადლობა გადაუხადა.

როგორც მინისტრმა პირდაპირ ეთერში აღნიშნა, სამედიცინო პერსონალის მიმართ გამოხატული მადლიერების ტაში სასიხარულო და სასიამოვნო ჟესტია მოქალაქეებისგან.

„მინდა შევუერთდე მადლირების ტაშს. ეს ნამდვილად ძალიან სასიამოვნო და სასიხარულო ჟესტია ჩვენი მოქალაქეებისგან. ჩვენი ექიმები, ექთნები, სანიტრები, ჩვენი სამედიცინო და გადაუდებელი დახმარების ექიმები, ასევე, მძღოლები იმსახურებენ ამ აპლოდისმენტებს. მიხარია, რომ ეს ნაბიჯი გადაიდგა ჩვენი მოქალაქეებისგან, ვინაიდან ახლა, რაც ექიმებს სჭირდება, ეს არის სწორედ მოქალაქეების მადლიერება და მხარში დგომა, რაც ამ პერფორმანსით ჩვენმა მოქალაქეებმა გამოხატეს. ჯანდაცვის სამინისტრო უერთდება ამ ტაშს. პირადად მე და მთელი სამინისტრო მადლობას ვუხდით პერსონალს. ჩვენ მათ გვერდით ვართ. მნიშვნელოვანია მოქალაქეების მხარში დგომა და ასევე, მადლობა მინდა გადავუხადო ჩვენს მოქალაქეებს და მოვუწოდო: ჩენ ვმუშაობთ თქვენთვის, თქვენ დარჩით სახლში ჩვენთვის“, – განაცხადა ეკატერინე ტიკარაძემ.

ცნობისთვის, დღეს, თბილისსა და რეგიონებში მოსახლეობამ სამედიცინო პერსონალს კორონავირუსის გავრცელების პერიოდში გაწეული თავდაუზოგავი მუშაობისთვის მადლობა ტაშით გადაუხადა. ღონისძიება სოციალურ ქსელში რამდენიმე დღის წინ დაიგეგმა. ამ მომენტისთვის საქართველოში კორონავირუსით 38 პაციენტია ინფიცირებული, ლეტალური შემთხვევა არ ფიქსირდება.

Facebook Comments
%d bloggers like this: