რუსთავის საკრებულოს ერთ-ერთი წევრის დედას კორონავირუსი დაუდასტურდა

რუსთავის საკრებულოს ერთ-ერთი  წევრის დედას კორონავირუსი დაუდასტურდა.

თავად საკრებულოს წევრს ჯერჯერობით კოვიდ 19 დადასტურებული არ აქვს, თუმცა მას ვირუსის სიმპტომები აღენიშნება.

ამ დროისთვის რუსთავის საკრებულოს 20-მდე დეპუტატი, მათ შორის საკრებულოს თავმჯდომარე თვითიზოლაციაში იმყოფება.

უკვე მიმდინარეობს კონტაქტების კვლევა, ვისაც შეხება ჰქონდა საკრებულოს იმ წევრთან, რომლის მშობელსაც კოვიდინფექცია დაუდგინდა.

რუსთავის მერის ირაკლი ტაბაღუას განცხადებით, ამ ეტაპზე 45-მდე პირია იდენტიფიცირებული.

„ბოლო ერთი კვირის განმავლობაში მე პირადად მასთან კონტაქტი და შეხება არ მქონია. ჩვენ კონსულტაციების საფუძველზე გუშინვე, დაახლოებით 11-ის ნახევრიდან დავიწყეთ იდენტიფიცირება იმ ადამიანების, რომელთანაც მას კონტაქტი ჰქონდა, ოთხშაბათი, ხუთშაბათი, პარასკევი, ამ დღეებზეა საუბრი. იდენტიფიცირებული ადამიანები გაფრთხილებული არიან და ამ წუთას იმყოფებიან თვითიზოლაციაში. ჩვენ ველოდებით ანალიზის პასუხს ამ პიროვნების, ვიზეც ჩვენ ახლა ყველა ვსაუბრობთ. დანარჩენი შიდა მონიტორინგი ახდენს მოკვლევას. დაახლოებით, 40 ადამიანის იდენტიფიცირება მოხდა, დაემატა კიდევ ხუთი ადამიანი. ახლა ხდება შიდა მონიტორინგი არსებული კამერების საშუალებით, რაც მუნიციპალიტეტის შენობაში დამონტაჟებულია, მიმდინარეობს შესწავლა, რომელ ადამიანებთან ჰქონდა კონტაქტი“ , – განაცხადა ირაკლი ტაბაღუამ.

არსებული ინფორმაციით, საკრებულოს წევრის დედა ეროვნული ბანკის თანამშრომელია, რომელსაც კიდევ ექვს თანამშრომელთან ერთად კოვიდ 19 დაუდგინდა.

რუსთავში შესაბამისი ღონისძიებები მიმდინარეობს, მერიისა და საკრებულოს შენობებს დეზინფექცია უტარდება.

Facebook Comments
%d bloggers like this: