გაერო: გაუზიარეთ ერთმანეთს აღდგომის დღესასწაულის განწყობა და არა ვირუსი!

“გაუზიარეთ ერთმანეთს აღდგომის დღესასწაულის განწყობა და არა ვირუსი!”, – გაერთიანებული ერების ორგანიზაცია საქართველოს მოსახლეობას აღდგომის დღესასწაულს ულოცავს, ამასთან, მოუწოდებს სახლში დარჩნენ.

როგორც გაეროს განცხადებაშია ნათქვამი, საქართველოს მოსახლეობამ აღდგომის დღესასწაულის აღნიშვნისას პირველ ადგილზე საზოგადოების ჯანმრთელობა უნდა დააყენოს.

“აღდგომა საქართველოსთვის ერთ-ერთი უმთავრესი დღესასწაულია, რომელსაც მრავალი ოჯახი ერთად აღნიშნავს. დღეს საზოგადოების სააღდგომო განწყობა ასევე გულისხმობს პასუხისმგებლობის აღებას კორონავირუსისგან საკუთარი თავისა და სხვათა დასაცავად.

განსაკუთრებით აღსანიშნავია, რომ საქართველოს მოსახლეობა გაგებით ეკიდება და იცავს მთავრობის რეკომენდაციებს, რომლებიც ჯანმრთელობის მსოფლიო ორგანიზაციის რჩევით შემუშავებულ პროფილაქტიკურ ზომებს ეფუძნება. 

მოვუწოდებთ თითოეულ ოჯახს საქართველოში, წელს აღდგომის დღესასწაულის აღნიშვნისას, პირველ ადგილზე დააყენონ საზოგადოების ჯანმრთელობა და კეთილდღეობა. გთხოვთ, დარჩეთ სახლში, ნუ შეიკრიბებით, რომ თქვენ და თქვენი ახლობლები ჯანმრთელად იყოთ ამ უჩვეულო ვითარებაში.

უფრო მეტად, ვიდრე ოდესმე, შორს თუ ახლოს მყოფ ახლობლებთან დასაკავშირებლად გამოვიყენოთ თანამედროვე ტექნოლოგიები, რადგან ფიზიკური დისტანცია არ არის სოციალური იზოლაცია. მოდით, ასეთი დისტანციური კავშირებით აღვნიშნოთ ყველამ ერთად ეს დღესასწაული.

ფიზიკური დისტანციის წესების დაცვით ჩვენ ვიცავთ საკუთარ თავს, ჩვენს საყვარელ ადამიანებს და მთელ საზოგადოებას, განსაკუთრებით კი ყველაზე დაუცველებს: ხანდაზმულებს, სუსტი იმუნური სისტემისა და ქრონიკული დაავადებების მქონე პირებს”, – ნათქვამია გაეროს განცხადებაში.

როგორც განცხადებაშია აღნიშნული, რეკომენდაციების შესრულებით ასევე დავიცავთ ჯანდაცვის მუშაკებს და ამ სფეროში დასაქმებულებს, რომლებიც 24 საათის განმავლობაში თავდაუზოგავად შრომობენ კორონავირუსის დასამარცხებლად პანდემიის დაწყების პირველივე დღიდან.

“ჩვენ უნდა დავრჩეთ სახლში, რომ ისინი იყვნენ ჯანმრთელად და დაავადებულთა მკურნალობა შეძლონ.

საქართველოში გაერთიანებული ერების ორგანიზაცია მოუწოდებს ქვეყნის ყველა მცხოვრებს, სახლში დარჩენით განაგრძონ თავიანთი მნიშვნელოვანი წვლილის შეტანა კორონავირუსთან ბრძოლაში. 

გაერთიანებული ერების ორგანიზაცია ბედნიერ აღდგომას უსურვებს საქართველოს ყველა მცხოვრებს, რომლებიც აღდგომის დღესასწაულს ზეიმობენ!”, – აღნიშნულია განცხადებაში.

Facebook Comments
%d bloggers like this: