მარინა კალიურანდი: მოვუწოდებ ყველა პარტიას, გააგრძელონ კონსტრუქციული თანამშრომლობა

Nusagi

პრეზიდენტის მიერ გიგი უგულავასა და ოქრუაშვილის შეწყალება ამსუბუქებს პოლიტიკურ პარტიებს შორის არსებულ დაძაბულობას, მოვუწოდებ ყველა პარტიას, გააგრძელონ კონსტრუქციული თანამშრომლობა არჩევნების წინა თვეებში – ამის შესახებ ევროპარლამენტარმა, მარინა კალიურანდმა ევროპარლამენტში, საგარეო საქმეთა კომიტეტის სხდომაზე განაცხადა.

„გუშინ ვესაუბრე ქართველ კოლეგას, დავით სონღულაშვილს, რომელმაც დამარწმუნა, რომ დისკუსია განახლდება როგორც კი საგანგებო მდგომარეობა მოიხსნება. პრეზიდენტის მიერ გიგი უგულავასა და ოქრუაშვილის შეწყალებას პოზიტიურ ნაბიჯად ვაფასებ, რაც ამსუბუქებს პოლიტიკურ პარტიებს შორის არსებულ დაძაბულობას და მოვუწოდებ ყველა პოლიტიკურ პარტიას, ოპოზიციის ჩათვლით, რომ გააგრძელონ კონსტრუქციული თანამშრომლობა არჩევნების წინა თვეებში. ორივე პარლამენტში ჩემს კოლეგებს მოვუწოდებ, ვიყოთ თავშეკავებულები, გამოვიჩინოთ მაღალი პასუხისმგებლობა და ვიყოთ სამართლიანები, გვახსოვდეს, რომ საქართველოს არჩევანი ევროპული გზაა. მნიშვნელოვანია, რომ ყველა განცხადება, რომელიც კეთდება, იყოს გადამოწმებულ, კოლეგებს ამისკენ მოვუწოდებ, გადავამოწმოთ ფაქტები, გაუგებრობის თავიდან აცილების მიზნით. თუ ვაკეთებთ პერსონალურ განცხადებებს, დავაკონკრეტოთ, რომ ეს არის პერსონალური განცხადებები“, – განაცხადა ევროპარლამენტარმა.

მარინა კალიურანდმა ასევე აღნიშნა, რომ ქვეყანამ „კოვიდ-19“-ის წინააღმდეგ ბრძოლას თავი კარგად გაართვა.

„საქართველომ შთამბეჭდავი რეფორმები განახორციელა. რა თქმა უნდა, ზოგიერთ სფეროში ჯერ კიდევ არის ხარვეზები, როგორიცაა შრომითი კანონმდებლობა, გარემოს დაცვა, დაუცველი ჯგუფების დისკრიმანციის წინააღმდეგ ბრძოლა. ასევე სიმართლეა, რომ საქართველო ახალგაზრდა დემოკრატიაა, სადაც კანონის უზენაესობა უნდა გამყარდეს, მაგრამ მოდით, შევხედოთ უფრო ფართო სურათს, წლების განმავლობაში საქართველო იკავებდა განსაკუთრებულ ადგილს აღმოსავლეთ პარტნიორებში და მე გთავაზობთ, რომ შემდეგში ფოკუსირებული ვიყოთ, დავაჩქაროთ ბაზრის ინტეგრაცია, რაც დადებით გავლენას მოახდენს საქართველოს ეკონომიკაზე. საქართველომ კარგად გაართვა თავი „კოვიდ-19“-ის წინააღმდეგ ბრძოლას. 21 მარტიდან საგანგებო მდგომარეობა გამოცხადდა, მათ არ დაუშვეს ის, რაც ევროკავშირის ზოგიერთ ქვეყანაში მოხდა“, – განაცხადა მარინა კალიურანდმა.

Facebook Comments

ახალი დადებული

%d bloggers like this: