თბილისიდან მინსკში გუშინ სამთავრობო თვითმფრინავით ელჩი გაემგზავრა

ბელარუსში საქართველოდან განხორციელებულ ფრენასთან დაკავშირებით საგარეო უწყება განმარტებას აკეთებს.

სამინისტროს განცხადებით, ბოლო დღეებში ბელარუსის რესპუბლიკაში განვითარებული მოვლენების გამო, საჭირო გახდა საქართველოს ელჩის მყისიერი დაბრუნება მინსკში და იქედან გამომდინარე, რომ ბელარუსთან შეზღუდულია საჰაერო მიმოსვლა და ელჩი საჭიროებდა მოკლე დროში მინსკში ჩასვლას, ის სამთავრობო თვითმფრინავით გაემგზავრა.

„ბელარუსის რესპუბლიკაში საქართველოს საგანგებო და სრულუფლებიანი ელჩი 6 აგვისტოდან იმყოფებოდა საქართველოში. ბოლო დღეებში ბელარუსის რესპუბლიკაში განვითარებული მოვლენების გამო საჭირო გახდა მისი მყისიერი დაბრუნება მინსკში.

იქედან გამომდინარე, რომ ბელარუსთან შეზღუდულია საჰაერო მიმოსვლა და ელჩი საჭიროებდა მოკლე დროში მინსკში ჩასვლას, მიღებულ იქნა გადაწყვეტილება მისი სამთავრობო თვითმფრინავით გამგზავრების შესახებ.

ბელარუსის რესპუბლიკა არის საქართველოს მეგობარი ქვეყანა, რომელთანაც გვაკავშირებს მჭიდრო თანამშრომლობა როგორც ორმხრივ ფორმატში, ასევე აღმოსავლეთ პარტნიორობის ინიციატივის ფარგლებში. შესაბამისად, ყურადღებით ვაკვირდებით მოვლენების განვითარებას. აღნიშნულ საკითხზე ჩვენ მჭიდრო კოორდინაციაში ვართ ჩვენს პარტნიორებთან. ჩვენი აზრით, აუცილებელია ბელარუსში პრობლემები გადაწყდეს მშვიდობიანად. იმედი გვაქვს, ბელარუსი ხალხი მისი მომავლისათვის მნიშვნელოვან საკითხებს თავად, მშვიდობიანად გადაწყვეტს“, – აღნიშნულია განცხადებაში.

ცნობისთვის, გუშინ „მთავარი არხის“ ჟურნალისტი იმყოფებოდა აეროპორტში და ცდილობდა დაცულ ტერიტორიაზე შესვლას, თუმცა მას ამის საშუალება არ მისცეს. არხის გენერალურ,ა დირექტორმა, ნიკა გვარამიამ კი, ვარაუდი გამოთქვა, რომ თვითმფრინავით საქართველოში ლუკაშენკოს ვაჟი ჩამოიყვანეს. „მთავარი არხის“ ჟურნალისტი დაცვის თანამშრომელს პირდაპირ ეთერში სხვადასხვა კითხვებს უსვამდა, მათ შორის: „ არის თუ არა ლუკაშენკო დიქტატორი?“.

Facebook Comments

ახალი დადებული