ბათუმის იუსტიციის სახლი მუშაობას დღეს განაახლებს

ბათუმის იუსტიციის სახლი მუშაობას დღეს განაახლებს. სახელმწიფო სერვისების განვითარების სააგენტოს ინფორმაციით, მომხმარებლები სერვისებს კვლავ ვიზიტის წინასწარი დაჯავშნის პრინციპით მიიღებენ, რაც პორტალ MY.GOV.GE-ზე უკვე შესაძლებელია.

„გარდა ვიზიტის წინასწარი დაჯავშნისა, მომხმარებელს კოვიდინფექციის გავრცელების თავიდან აცილების მიზნით ჯანდაცვის სამინისტროს მიერ დაწესებული მოთხოვნების მკაცრად დაცვა მოუხდება. მომხმარებელი მომსახურების სივრცეში, თერმოსკრინინგის გავლის შემდეგ, მხოლოდ პირბადით დაიშვება, რომელიც შენობის დატოვებამდე წესების დაცვით უნდა ჰქონდეს სახეზე მორგებული. პრევენციის მიზნით, კვლავ შეზღუდული იქნება მომსახურების დარბაზში მცირეწლოვანი ბავშვებით და იმ თანმხლები პირებით შესვლა, რომლებიც არ წარმოადგენენ ამა თუ იმ სერვისის მონაწილე მხარეებს.

მომხმარებლის ინტერესის გათვალისწინებით, წინასწარი დაჯავშნის გარეშე მხოლოდ გარდაცვალების მოწმობის მიღება იქნება შესაძლებელი“, – აღნიშნულია სახელმწიფო სერვისების განვითარების სააგენტოს ინფორმაციაში.

მათივე ცნობით, ბათუმის იუსტიციის სახლის გახსნის გადაწყვეტილება მას შემდეგ იქნა მიღებული, რაც სრულად განხორციელდა ჯანდაცვის სამინისტროს მიერ რეკომენდებული ყველა პრევენციული ზომა.

„დღეისთვის იუსტიციის სახლის შენობა სრულად დეზინფიცირებულია. მომსახურების დარბაზები, მაგიდებისა და სხვა ავეჯის ზედაპირები, ასევე შენობის 17-ვე სართულზე არსებული სამუშაო ფართები სრულად დამუშავებულია სპეციალური ხსნარებით.

ბათუმის იუსტიციის სახლის თანამშრომელთა სრულ შემადგენლობას კოვიდინფექციაზე ტესტირება ორჯერ ჩაუტარდა. შედეგად, 7-9 სექტემბრის შუალედში გამოვლენილი სამი შემთხვევის გარდა, ინფიცირების სხვა შემთხვევები არ დაფიქსირებულა. 14 სექტემბრიდან სამუშაოს მხოლოდ ის ოპერატორები დაუბრუნდებიან, ვისთანაც ტესტირების შედეგები ორივე ჯერზე უარყოფითი იყო. აღსანიშნავია, რომ 8 სექტემბრიდან, ბათუმის იუსტიციის სახლის ყველა თანამშრომელი თვითიზოლაციაში იმყოფებოდა“, – აღნიშნულია სახელმწიფო სერვისების განვითარების სააგენტოს ინფორმაციაში.

Facebook Comments

ახალი დადებული