ირმა ჭკადუა მიკროსაფინანსო ორგანიზაციაში შეჭრაზე: ეს იყო ერთგვარი აქცია-პერფორმანსი

Nusagi

თბილისში, წერეთლის გამზირზე, მიკროსაფინანსო ორგანიზაციაზე თავდასხმაში ბრალდებულის ადვოკატი ირმა ჭკადუა აცხადებს, გუშინ არავინ დაშავებულა.

ჭკადუას განცხადებით, დაკავებულს საკუთარი სურვილით გამოეხმაურა და ორ სხვა ადვოკატთან ერთად მის ინტერესებს უსასყიდლოდ დაიცავს.

მისი თქმით, მიკროსაფინანსო ორგანიზაციაზე თავდასხმა იყო ერთგვარი აქცია-პერფორმანსი, რადგან სოციალური საკითხებისა და არსებული პრობლემების მოგვარების მიზნით, მიკროსაფინანსო ორგანიზაციაში შეჭრილი პირი სახელმწიფოსა და მასმედიის ყურადღების მიქცევას ცდილობდა.

„რეალურად არავინ დაზიანებულა, ფული არ მოუთხოვია, ყაჩაღობას არ ჰქონდა ადგილი. ეს არ იყო ნამდვილი იარაღი. ე.წ მძევლებს რაც შეეხება, რა თქმა უნდა, გარკვეული სტრესი მიიღეს, მძიმე იყო მათი და მათი ოჯახების მდგომარეობა, მაგრამ მერწმუნეთ, არავისთვის არ მიუყენებია ზიანი. ვინც სთხოვა, გამოსულიყო, მან ისინი გამოუშვა. მეტსაც გეტყვით, მოლარე გოგონას სთხოვა, სალაროდან რომ გამოვიდა, დაეკეტა სალაროს კარები, რომ არ დაკარგულიყო რაიმე თანხა, მასთან რომ არ ჰქონოდათ ამ მიმართულებით პრობლემა. ეს იყო ერთგვარი პროტესტის ფორმა და პერფორმანსი. ჩვენ კარგად ვიცით, როგორ შეიძლება მასმედიისა და ხელისუფლების ყურადღება მიიპყრო ამ ქვეყანაში. თუ არ არის კონკრეტული მასმედიის დღის წესრიგი, არავის გააშუქებენ. ეს იყო ერთგვარი აბსოლუტურად გულწრფელი პროტესტი. პროტესტი, რომელიც გააჩნია თითოეულ ჩვენგანს.

ჩვენ გვყავდა მაჟორიტარობის კანდიდატი წამლების ბიზნესიდან და არასდროს უთქვამს, რომ წამლების ფასი დაიწევდა, ასევე გვყავდნენ ბანკირები, რომელთაც არ უსაუბრიათ, რომ საპროცენტი განაკვეთი დაიწევდა. მეტსაც გეტყვით, გვყავს ხელისუფალი, რომელსაც არასდროს უსაუბრია იმაზე, რომ როცა მივიღვწით დასავლური ღირებულებებისკენ, არც ერთ ქვეყანაში არ არის ის საპროცენტო განაკვეთები, რაც არის საქართველოში. თაობები გაანადგურა და რეალურად, სათამაშო ბიზნესმა ოჯახები უსახლკაროდ დატოვა და ეს არის ფუნდამენტური პრინციპი, რაც აწუხებს ჩვენს მოსახლეობას. არც ერთი პოლიტიკოსი არ საუბრობს ამ რეალურ პრობლემებზე. ეს იყო მისი გულწრფელი პროტესტი და ამიტომაც ვიცავ მას უანგაროდ. მინდა, მან სრულყოფილი იურიდიული სერვისი მიიღოს“, – განაცხადა ირმა ჭკადუამ.

Facebook Comments
%d bloggers like this: