ევროპა რუსული გაზის და პუტინი ბოტოქსის გარეშე – ეკონომიკური ფრონტის შედეგები

გაირკვა, რომ აშშ-ისა და ევროკავშირის სანქციები, რომლებიც ბლოკავს რუსეთის რეზერვების ნაწილს, არ ვრცელდება 2022 წლის მარტამდე გამოშვებულ რუსული ობლიგაციების გადახდებზე.

თუმცა, მიმდინარე წლის მაისის ბოლოს, რუსეთი ვერ შეძლებს ასეთი გადახდების განხორციელებას: რუსეთის მთავრობისგან თანხების მისაღებად, ინვესტორებს, რომლებიც ფლობენ რუსულ ობლიგაციებს, სპეციალური ლიცენზია უნდა მიიღონ.

დეფოლტის გადადება არ გამორიცხავს რუსეთის ეკონომიკასთან არსებულ ფუნდამენტურ ეკონომიკურ პრობლემებს. 

აგრესორის წინააღმდეგ სანქციები უკვე უფრო მეტ ზიანს აყენებს რუსეთის ეკონომიკას, ვიდრე სავარაუდო დეფოლტი.

დასუსტებული ეკონომიკა რუსებს აიძულებს, გადახედონ თავიანთ რიტორიკას უკრაინასთან მოლაპარაკებებში საომარი მოქმედების დასრულების მიზნით, თუმცა, ეს სანქციები ჯერ კიდევ არ არის საკმარისი იმისათვის, რომ აგრესორმა თავისი დანაკარგი და მარცხი აღიაროს. 

გაზი არის, მყიდველი არა

გაზი რუსეთისთვის სტრატეგიული საქონელია, რომელიც აგრესორს მნიშვნელოვან სავალუტო შემოსავალს აძლევს. 

ევროპულ სახელმწიფოებთან გაზის კონტრაქტების გაფორმებით, რუსეთი მათგან გარკვეულ დათმობებს და პრივილეგიებს ეძებდა გაზზე „ფასდაკლების“ სანაცვლოდ. ევროპის წამყვან ენერგეტიკულ კომპანიებთან ერთობლივმა პროექტებმა, როგორიცაა Nord Stream 2, რუსეთს საშუალება მისცა მიეღო ევროპის მთავრობების მხარდაჭერა.

ომის შემდეგ რუსეთმა დაკარგა „გაზის“ გავლენა ევროპაში.  რუსული გაზის ყველაზე დიდი მომხრე – გერმანიაც კი არ გამორიცხავს, რომ აგრესორის საწვავს ემბარგო დაადოს. 

„ყველა შესაძლო ვარიანტი განიხილება“, – აცხადებს გერმანიის ფინანსთა მინისტრი. 

შეერთებული შტატები მზად არის კომპენსაცია აუნაზღაუროს ევროპას რუსულ გაზზე უარის თქმისთვის . ჯო ბაიდენის ადმინისტრაციამ დაუშვა თხევადი ბუნებრივი აირის დამატებითი ექსპორტი. 

არა ინსტაგრამი – არა ბოტოქსი

ომის 23-ე დღეს საერთაშორისო კომპანიები აგრძელებენ რუსეთთან კავშირების გაწყვეტას და რუსული კომპანიები სულ უფრო მეტად იწყებენ სანქციების გავლენის შეგრძნებას. 

კიდევ სამმა კომპანიამ განაცხადა რუსულ ბაზარზე გაყიდვების შეჩერების შესახებ. მათ შორისაა ყველაზე ცნობილი პრინტერების მწარმოებელი Xerox , ნახევარგამტარების მწარმოებელი Qualcomm და კომპიუტერული თამაშების იაპონური დეველოპერი Square Enix. 

რუსეთის ფარმაცევტული ბაზარი შოკირებულია კიდევ ერთი არასასიამოვნო სიახლით. უფრო კონკრეტულად კი  AbbVie-მ განაცხადა, რომ რუსეთს არ მიაწვდის ბოტოქსს და ესთეტიკური მედიცინისთვის საჭირო კომპონენტებს.  ეს უკანასკნელი კი ყველაზე მეტად სჭირდება აგრესორ ქვეყანას და მის ბაზარს. 

მნიშვნელოვნად დაზარალდა სპორტული ინდუსტრიაც. საფეხბურთო კლუბებმა „მილანმა“, „რეალმა“ და „პსჟმ“ შეაჩერეს ხელშეკრულებები რუსეთის უმსხვილეს ტოტალიზატორ Fonbet-თან. 

რუსეთისთვის იმპორტის ჩანაცვლების ქრონიკები ასევე, რბილად რომ ვთქვათ, არც თუ ისე წარმატებულია. რუსეთის უმსხვილესი ავიაკომპანია „ვოლგა-დნეპრი“ ერთი კვირაა გაჩერებულია. 

როგორც ჩანს, საბჭოთა კავშირში დაბრუნება ადვილია, მაგრამ ასეთ პირობებში წარმატების მიღწევა გაცილებით რთული.

მასალა მომზადებულია Epravda-ს მიხედვით.