მიხეილ სააკაშვილმა პროტესტის ნიშნად შიმშილობა გამოაცხადა, – ამის შესახებ ექსპრეზიდენტ მიხეილ სააკაშვილის ადვოკატმა შალვა ხაჭაპურიძემ სააკაშვილის მონახულების შემდეგ განაცხადა.
ადვოკატმა მესამე პრეზიდენტის წერილი ჟურნალისტებს გააცნო:
„დღეს უარი მეთქვა ყველაზე ელემენტარულ უფლებაზე, დავესწრო საკუთარ სასამართლო პროცესს. ეს არის ყველა ქართული და საერთაშორისო ნორმის დარღვევა.
იძულებული ვარ მივმართო პროტესტის უკიდურეს ფორმას – შიმშილობას.
რა თქმა უნდა, ვაცნობიერებ ყველა რისკს, ჩემი ამჟამინდელი ჯანმრთელობის მდგომარეობის გათვალისწინებით, თუმცა ვიშიმშილებ მანამდე, სანამ არ მივიღებ მყარ გარანტიებს საკუთარ პროცესზე ვიდეოლინკით მაინც ჩართვის. ყოველგვარ დაცინვას და დამცირებას საზღვარი აქვს“, – აცხადებს მიხეილ სააკაშვილი.
შეგახსენებთ, მესამე პრეზიდენტი მიხეილ სააკაშვილი მორიგ სასამართლო პროცესს დისტანციურად ვერ ჩაერთო. სააკაშვილის სასამართლო პროცესი კი 22 დეკემბრის 11:00 საათამდე გადაიდო. მოპასუხე მხარე სააკაშვილის სასამართლო პროცესის გადადებას 1 თვით ითხოვდა, თუმცა სასამართლომ არ დააკმაყოფილა.
მოსამართლე გიორგი არევაძემ კი პენიტენციურ სამსახურს დაავალა, სააკაშვილთან დაკავშირებული ყველა დაცული ვიდეომასალა, დაცვის მხარეს გადასცეს.
