მეოთხე პრეზიდენტი გიორგი მარგველაშვილი მესამე პრეზიდენტ მიხეილ სააკაშვილთან დაკავშირებით ყოფილი მაღალჩინოსნების მიერ გავრცელებულ ერთობლივ განცხადებას „მთავართან“ საუბარში გამოეხმაურა და თქვა, რომ ამ წერილს რამდენიმე დანიშნულება აქვს.
„ამ წერილს აქვს რამდენიმე დანიშნულება. პირველი არის ის, რომ საზოგადოებრივი აზრის კონსოლიდაცია განურჩევლად პოლიტიკური ორიენტაციისა. ეს წერილი ავლებს ნათელ ზღვარს – სადისტსა და იმ ადამიანს შორის, რომელსაც არ უნდა, რომ საქართველოში ჩადენილ იქნეს სისხლის სამართლის დანაშაული, ანუ პატიმრის წამებით მოკვდინება. ეს არის აქ განსხვავება. ან ხარ სადისტი და კრიმინალი, იმიტომ, რომ აწამებ ადამიანს ან უბრალოდ ამბობ, რომ სამართალი უნდა აღსრულდეს სწორი ფორმით. ეს არის ისტორიის წინაშე ჩვენი თავს მართლების მცდელობა“, – განაცხადა მარგველაშვილმა.
მისივე თქმით, მას არ აქვს ილუზია, რომ რამე უნდა მოუწოდოს ბიძინა ივანიშვილს ან „ქართულ ოცნებას“.
„არ მაქვს ილუზია, რომ რამე უნდა მოვუწოდო ან ბიძინა ივანიშვილს ან „ქართულ ოცნებას“. მე მაქვს პროცესის იმედი, რომელიც დღეს დაიწყო და გაღრმავდება“, – დასძინა მარგველაშვილმა.
