გერმანული მედიის ცნობით, მას შემდეგ, რაც HateAid-ის თანამშრომლებს აშშ-ის სანქციები დაუწესდათ, ირკვევა, რომ აშშ-ის მთავრობას ყურადღების ცენტრში ასევე ჰყავდა მაღალი რანგის გერმანელი ოფიციალური პირები.
გამოცემა “Nius”-ის ინფორმაციით, ფედერალური კონსტიტუციის დაცვის სამსახურის მიერ AfD-ის „დადასტურებულად მემარჯვენე ექსტრემისტულ“ ორგანიზაციად კლასიფიცირების შემდეგ, ტრამპის ადმინისტრაცია, როგორც ჩანს, განიხილავდა ამ გადაწყვეტილებაზე პასუხისმგებელი პირების წინააღმდეგ სანქციების დაწესებას.
რამდენიმე ყოფილი ამერიკელი მაღალჩინოსნის ინფორმაციით, ვაშინგტონში მიმდინარეობდა მსჯელობა გერმანიის სახელმწიფო მოხელეების წინააღმდეგ ზომების მიღების შესახებ.
აშშ-ის სახელმწიფო დეპარტამენტში საუბარი იყო პასუხისმგებელი პირებისთვის აშშ-ში შესვლის აკრძალვაზე ან ფინანსური სანქციების დაწესებაზე. უცნობია, თუ რომელ კონკრეტულ პირებს შეეხებოდა ეს ზომები. AfD-ის კლასიფიცირება ამჟამად შეჩერებულია, პარტიის მიერ შეტანილ სარჩელზე გადაწყვეტილების მიღებამდე.
მიმდინარე წლის მაისის დასაწყისში გერმანიის ფედერალურმა შინაგან საქმეთა სამინისტრომ, რომელიც მაშინ ნენსი ფეზერის (SPD) ხელმძღვანელობით მუშაობდა, გადაწყვიტა, რომ კონსტიტუციის დაცვის სამსახურს AfD-ის შესახებ „შეფასება“ გამოექვეყნებინა იმ შიდა შემოწმების გარეშე, რომელიც ჩვეულებრივ ასეთ შემთხვევებში ტარდება.
