მართლმადიდებლობის საპარლამენტთაშორისო ასამბლეის საერთაშორისო სამდივნო დელეგაციამ, ილია მეორის საფლავს პატივი მიაგო. სიონის ტაძარში, პატრიარქის სულის მოსახსენებელი პანაშვიდი ქართულ, ინგლისურ და ბერძნულ ენებზე აღევლინა და დელეგაციის წევრებმა ბერძნულად იგალობეს.
ორდღიანი ვიზიტის ფარგლებში, ასამბლეის წევრები საქართველოს პრეზიდენტსა და პარლამენტის თავმჯდომარეს შეხვდნენ, მოილოცეს წმინდა ნინოს საფლავი.
დელეგაციის შემადგენლობაში იყვნენ სომხეთის, ბოსნია-ჰერცეგოვინის, კვიპროსის, ეგვიპტის, საბერძნეთის, უნგრეთის, იორდანიის, ჩრდილოეთ მაკედონიის, რუმინეთისა და სერბეთის წარმომადგენლები.
„გადაწყვიტეს, რომ საპატრიარქოდან ფეხით მობრძანებულიყვნენ სიონის ტაძარში, რომ თავიანთი ღრმა პატივისცემა და სიყვარული გამოეხატათ საქართველოს აწ უკვე გარდაცვლილი პატრიარქის მიმართ. ეს არის უაღრესად დასაფასებელი. დელეგაციის ხელმძღვანელებმა მოითხოვეს, რომ საგალობელი შეესრულებინათ ძველ ბერძნულ ენაზე. პატრიარქის ავტორიტეტის მთელს მსოფლიოში დიდია და ეს ავტორიტეტი ყველა ჩვენგანს სიამაყით ავსებს“, – განაცხადა თბილისის სასულიერო აკადემიისა და სემინარიის რექტორმა, საქართველოს ეკლესიის პროტოპრესვიტერმა, მამა გიორგი ზვიადაძემ.
