გერმანიის თავდაცვის მინისტრი ბორის პისტორიუსი აშშ-ის ვიცე-პრეზიდენტის, ჯეი დი ვენსის მიერ მიუნხენის უსაფრთხოების სამიტზე ევროპის შესახებ გაკეთებულ განცხადებებს მიუღებელს უწოდებს. ამის შესახებ პისტორიუსმა მიუნხენის უსაფრთხოების კონფერენციაზე გამოსვლისას ისაუბრა.
„ცოტა ხნის წინ აშშ-ის ვიცე-პრეზიდენტმა მთელი ევროპისთვის დემოკრატია კითხვის ნიშნის ქვეშ დააყენა. მან ისაუბრა დემოკრატიის გაუქმებაზე და თუ სწორად გავიგე, პირობები ევროპის ზოგიერთ ნაწილში ავტორიტარულ რეჟიმებს შეადარა, ბატონებო და ქალბატონებო, ეს მიუღებელია“, – განაცხადა პისტორიუსმა.
მინისტრის თქმით, იმ დემოკრატიაში, სადაც ის ცხოვრობს და ამჟამად კამპანიას აწარმოებს, ყველა მოსაზრებას აქვს საკუთარი ხმა. პისტორიუსმა აღნიშნა, რომ ექსტრემისტულ პარტიებს, როგორიცაა „ალტერნატივა გერმანიისთვის“, შეუძლიათ, ნორმალურად კამპანიის წარმოება ისევე, როგორც ნებისმიერ სხვა პარტიას. თავდაცვის მინისტრის თქმით, ის მტკიცედ ეწინააღმდეგება ვენსის წარმოდგენას, რომ ევროპა ახშობს უმცირესობების ხმებს.
რუსეთ-უკრაინის შესახებ საუბრისას პისტორიუსმა აღნიშნა, რომ ნატო-მ არ უნდა მოხსნას არცერთი საკითხი დღის წესრიგიდან მოლაპარაკებების დაწყებამდე.
„ტრანსატლანტიკურმა ალიანსმა არაფერი არ უნდა მოხსნას დღის წესრიგიდან სამშვიდობო მოლაპარაკებების დაწყებამდე. უკრაინის საზღვაო წევრობის ან ტერიტორიული საკითხების განხილვა უნდა მოხდეს მოლაპარაკებების მაგიდასთან, ფრთხილი განსჯით და მოკავშირეებთან მჭიდრო კოორდინაციით. ამავდროულად, მდივანმა ჰეგსეთმა ნათლად განაცხადა, რომ აშშ კვლავ დარჩება ჩართული ნატო-სა და ევროპაში. თუმცა ბოლო განცხადებები ასევე მკაფიო შეხსენებაა იმისა, რაც წლების განმავლობაში ცხადი იყო. თუ გულწრფელები ვიქნებით, ჩვენ, ევროპელებმა, უნდა შევიტანოთ ლომის წილი ევროპაში კონვენციურ შეკავებასა და თავდაცვაში. ჩვენ უნდა ჩამოვაყალიბოთ რეალობა, რომელშიც ვცხოვრობთ, სანამ ის ჩვენ ჩამოგვაყალიბებს“, – განაცხადა პისტორიუსმა.
ცნობისთვის, აშშ-ის ვიცე-პრეზიდენტმა, ჯეი დი ვენსმა მიუნხენის კონფერენციაზე გამოსვლისას განაცხადა: „საფრთხე, რომელიც ყველაზე მეტად მაღელვებს ევროპასთან დაკავშირებით, არის არა რუსეთი, არა ჩინეთი, არამედ საფრთხე შიგნიდან, ევროპის დაშორება ფუნდამენტური ღირებულებისგან“
