„ხალხის ძალის“ წევრი, ანალიტიკოსი თამარ ჩიბურდანიძე ოპოზიციაში მიმდინარე პროცესების შესახებ ანალიზს ავრცელებს.
როგორც თამარ ჩიბურდანიძე აღნიშნავს, მიხეილ სააკაშვილსა და სალომე ზურაბიშვილს შორის კონკურენციაა, რადგან უცხო ძალებს „ძველი“ სააკაშვილის „ახალი“ ზურაბიშვილით ჩანაცვლება სურთ.
„როგორც კი სალომე ზურაბიშვილმა ოპოზიციის ლიდერობა დააპირა, ეგრევე გააკეთა განცხადება მიხეილ სააკაშვილმა, რომ ოპოზიციის გაერთიანება მხოლოდ მის ირგვლივ უნდა მოხდეს და საკუთარ თავს მისცა ფუნქცია. სააკაშვილი მიხვდა, რომ უცხოეთი გეგმა ბ-ზე გადავიდა, ანუ მათ ჩანაცვლებაზე, რადგან „ნაცმოძრაობის“ უშედეგო გათეთრებაში ფულს აღარ ყრიან, თუმცა სურთ იგივე გუნდი სახეშეცვლილი შეატყუონ ქართველ ამომრჩეველს. სწორედ ამიტომ, სააკაშვილი მთელი რესურსით იბრძვის, რომ არ დარჩეს მიტოვებული.
აქედან გამომდინარე, სალომე ზურაბიშვილს სერიოზული მეტოქე ჰყავს სააკაშვილის სახით. ზურაბიშვილი უცხოეთის ლობისტების ახალი პროექტია, სააკაშვილი კი – ძველი. რისკები ნამდვილად დიდია მიშასთვის და სწორედ ამიტომ გააქტიურდა პოლიტიკაში გისოსებს მიღმა. თუმცა, მათთვის მთავარია, რას დაგეგმავენ უცხოეთში მათი ლობისტები და ვის რა როლს დააკისრებენ საარჩევნოდ საქართველოში.
პრეზიდენტის სასახლეშიც ყოველდღიური ვოიაჟები ოპოზიციური პარტიების მხრიდან მხოლოდ პოზიორობაა. სინამდვილეში კი მათი უფროსების მიერ შედგენილ სცენარში უკვე ყველაფერი გაწერილია და ვერც ვერავინ გაბედავს ამ სცენარის შეცვლას.
ერთი კი ნამდვილად გაუხდებათ საჩოთირო – ვის ირგვლივ უნდა შემოიკრიბოს პულსდაკარგული ოპოზიცია? აქ საუბარია მხოლოდ ლიდერზე, თორემ ყველანი ერთად რომ ნაცმოძრაობის ირგვლივ არიან და მისი იდეოლოგიით ხელმძღვანელობენ, ეს ყველასათვის ნათელია. ზურაბიშვილი თუ ისევ სააკაშვილი? ვნახოთ, დაათმობინებენ თუ არა მიშას პირველობას? თუ მიშა ჩამოაქვეითეს, მაშინ „მიშა! მიშა!“-ს ერთგული ამომრჩეველი გაბრაზდება. და თუ მიშას სალომეს კალთას არ ამოაფარებენ, მაშინ დაძველებული „ნაცმოძრაობა“ სასურველ შედეგს ვერ მოუტანთ. მოკლედ, დიდი აურზაურია ოპოზიციის „სალხინეთში“, – წერს თამარ ჩიბურდანიძე.
