FBI-ს დირექტორმა კეშ პატელმა აღმოაჩინა კონფიდენციალური დოკუმენტები, რომლებიც აშშ-ის პრეზიდენტ დონალდ ტრამპისა და რუსეთის სავარაუდო კავშირების შესახებ გამოძიებას უკავშირდება. ინფორმაცია ტელეკომპანია Fox News-მა წყაროებზე დაყრდნობით გაავრცელა.
ტელეკომპანიის ცნობით, პატელმა დასაწვავად განკუთვნილ პაკეტებში მოთავსებული „ათასობით დოკუმენტი“ იპოვა. სახელმწიფო დაწესებულებებში ასე ინახება საიდუმლო ინფორმაცია, რომელიც გარკვეული დროის შემდეგ უნდა განადგურდეს.
ეს პაკეტები თითქოსდა „საიდუმლო ოთახში“ ინახებოდა. საუბარია ე.წ. საიდუმლო ინფორმაციის დამუშავების სპეციალურ ზონაზე (SCIF). Fox News-ის წყაროების თანახმად, პატელმა და მისმა გუნდმა FBI-ს შენობაში აღმოაჩინეს SCIF, რომლის არსებობის შესახებ ადრე ცნობილი არ იყო. ივნისში პატელი ჯო როგანის პოდკასტში ამბობდა, რომ ამ ოთახში ინახებოდა დოკუმენტები და მყარი დისკები, „რომლებიც არავის უნახავს და არავის სმენია მათზე“.
აღმოჩენილ დოკუმენტებს შორის იყო სპეციალური პროკურორის ჯონ დარემის ანგარიშის გასაიდუმლოებული დანართი, რომელშიც ნათქვამია, რომ აშშ-ის სადაზვერვო საზოგადოებას ჰქონდა სანდო წყაროები, რომლებიც მიუთითებდნენ იმაზე, რომ „FBI შეასრულებდა როლს ტრამპისა და რუსეთის კავშირების შესახებ ნარატივის გავრცელებაში“.
პატელის მიერ აღმოჩენილი დოკუმენტები სენატის იურიდიულ კომიტეტს გადაეცემა, რომელიც მათ გამოაქვეყნებს. ერთ-ერთი წყაროს თქმით, „დანართის გამოქვეყნება გაზრდის სანდოობას მტკიცების მიმართ, რომ მთავრობის შიგნით არსებობდა გეგმა, რომელიც [ჰილარი] კლინტონის შტაბს სკანდალის გაღვივებაში უნდა დახმარებოდა ტრამპისა და რუსეთის კავშირებთან დაკავშირებით [2016 წლის საპრეზიდენტო არჩევნებამდე]“.
