დიმიტრი ხუნდაძე „საქართველოს ტყის კოდექსში ცვლილების შეტანის შესახებ“: საქმიანი (სატყეო) ეზოები კარგი შესაძლებლობაა, მაგრამ, გეოგრაფიულად, მეტად გონივრულად არის გადასანაწილებელი

საპარლამენტო პოლიტიკური ჯგუფ „ხალხის ძალის“ ხელმძღვანელმა, რეგიონული პოლიტიკისა და თვითმმართველობის კომიტეტის წევრმა, დეპუტატმა დიმიტრი ხუნდაძემ, რეგიონული პოლიტიკისა და თვითმმართველობის კომიტეტის სხდომაზე, სადაც განიხილებოდა საქართველოს მთავრობის მიერ საკანონმდებლო ინიციატივის წესით წარმოდგენილი კანონპროექტი – „საქართველოს ტყის კოდექსში ცვლილების შეტანის შესახებ“, რომლის მომხსენებელიც იყო საქართველოს გარემოს დაცვისა და სოფლის მეურნეობის მინისტრის მოადგილე ზურაბ ეზუგბაია, მომხსენებლსა და დამსწრეებს სიტყვით მიმართა.

დიმიტრი ხუნდაძის თქმით, საქმიანი (სატყეო) ეზოები კარგი შესაძლებლობაა, მაგრამ, გეოგრაფიულად, მეტად გონივრულად არის გადასანაწილებელი.

„კარგია, რომ ვიგეგმებით. რა თქმა უნდა, ჯობდა, რომ ეს მოგვესწრო მანამდე. ასევე, კარგია, რომ პერსონალი რაოდენობრივად იზრდება, მაგრამ ერთი, რჩევისთვის – საქმიანი (სატყეო) ეზოები კარგი შესაძლებლობაა, მაგრამ, გეოგრაფიულად, ვფიქრობ, მეტად გონივრულად არის გადასანაწილებელი. მით უმეტეს, მთიან რეგიონში მიწვდომადობა გართულებულია და ზოგჯერ ტრანსპორტირება იმდენი უჯდება [ადამიანს], რომ იძულებულია ან დარღვევაზე წავიდეს, ან იქ, ადგილზე, შეიძინოს სხვა გზით. ამიტომ, მხოლოდ არსებობა არა, მიწვდომადობაც უნდა იყოს გათვალისწინებული და მისი გეოგრაფიული შინაარსიც – ეს ჩემი რჩევა, პრაქტიკიდან“, – აღნიშნა დიმიტრი ხუნდაძემ.

საქართველოს გარემოს დაცვისა და სოფლის მეურნეობის მინისტრის მოადგილის, ზურაბ ეზუგბაიას განცხადებით, საქმიანი (სატყეო) ეზოების ლოკაციაც იქნება გადასინჯული და მათი ეფექტიანობის გაზრდაზეც მიმდინარეობს მუშაობა.