ირანი ამჟამად სამხედრო მზადყოფნის უმაღლეს დონეზეა და შეერთებული შტატები ან სიონისტური რეჟიმი აგრესიის რაიმე აქტს თუ შეეცდება, ისინი მოულოდნელობის წინაშე აღმოჩნდებიან, – ირანული მედიის თანახმად, ამის შესახებ ირანის უსაფრთხოების სამსახურის ერთ-ერთმა თანამშრომელმა განაცხადა.
ირანის უსაფრთხოების სისტემის წარმომადგენელი აცხადებს, რომ ამერიკელების ქმედებები არ არის ირანის მიმართ მუქარის გზავნილი, არამედ რეაქციაა ირანის მხრიდან მათი ინტერესების წინააღმდეგ მიმართულ მუქარაზე.
ეს განცხადებები მას შემდეგ გაკეთდა, რაც შეერთებულმა შტატებმა დასავლეთ აზიის რეგიონიდან თავისი პერსონალის ნაწილობრივი ევაკუაცია დაიწყო.
11 ივნისს აშშ-ის სახელმწიფო დეპარტამენტმა ბაღდადში მდებარე საელჩოდან არასაგანგებო პერსონალის გაყვანა ბრძანა და ბაჰრეინის, ქუვეითისა და არაბთა გაერთიანებული საამიროების ბაზებიდან სამხედრო მოსამსახურეების ოჯახის წევრებს ნებაყოფლობითი გამგზავრების უფლება მისცა.
პარალელურად, „ისლამური რევოლუციის გუშაგთა კორპუსის“ ხელმძღვანელი, გენერალ-მაიორი ჰოსეინ სალამი აცხადებს, რომ ირანი სრულად მზადაა, უპასუხოს ნებისმიერ საფრთხეს.
