ამერიკულმა ტექნოლოგიურმა კომპანიამ, აღმასრულებელი დირექტორი ენდი ბაირონი სამსახურიდან გაათავისუფლა მას შემდეგ, რაც ის Coldplay-ის კონცერტზე, კომპანიის HR-თან ერთად რომანტიკულ სკანდალში გაეხვა. ვიდეო სოციალურ ქსელებში ვირუსულად გავრცელდა. ინფორმაციას BBC-ი ავრცელებს.
ვიდეოში, რომელიც თავდაპირველად სტადიონის გიგანტურ ეკრანზე გამოჩნდა, წყვილი ერთმანეთს ეხვევა, თუმცა ეკრანზე გამოჩენის შემდეგ კამერას ემალებიან.
Coldplay-ის წამყვანმა ვოკალისტმა, კრის მარტინმა, წყვილის დამალვის ნახვის შემდეგ, მაყურებელს უთხრა: “ან რომანი აქვთ, ან უბრალოდ ძალიან მორცხვები არიან”.
TikTok-ზე გამოქვეყნებულმა თავდაპირველმა ვიდეომ მილიონობით ნახვა დააგროვა. შემდეგ ის სხვადასხვა პლატფორმაზე გავრცელდა.
მომხდარიდან ორი დღის შემდეგ, კომპანიამ X-ზე დაადასტურა, რომ მისი აღმასრულებელი დირექტორი ენდი ბაირონი გაათავისუფლეს. Astronomer-მა განცხადება გაავრცელა:
“Astronomer-ი ერთგულია იმ ღირებულებების და კულტურის, რომლებიც ჩვენი დაარსების დღიდან გვაქვს. დირექტორთა საბჭომ ამ საკითხთან დაკავშირებით ოფიციალური გამოძიება დაიწყო და დამატებითი დეტალები ძალიან მალე გვექნება,”- ნათქვამია განცხადებაში.
Astronomer-ის – 1.3 მილიარდ დოლარზე მეტად შეფასებული პროგრამული უზრუნველყოფის კომპანიის აღმასრულებელი დირექტორი ენდი ბაირონი დაქორწინებულია. ის ფირმას 2023 წლის შუა რიცხვებიდან ხელმძღვანელობს.
