ვისკონსინის შტატის მკვიდრი, რომელმაც კაიაკით სეირნობისას საკუთარი სიკვდილი გააყალბა და ცოლი და სამი შვილი მიატოვა, რათა საქართველოში მყოფ ქალს შეხვედროდა, დამნაშავედ ცნეს. მას 89 დღე პატიმრობა მიესაჯა. ეს დრო ზუსტად ემთხვევა იმ პერიოდს, რა დროსაც მამაკაცი წარმატებით ემალებოდა სამართალდამცველებს. ინფორმაციას CNN ავრცელებს.
გამოცემა წერს, რომ თავდაპირველად ბორგვარდტი თავს უდანაშაულოდ მიიჩნევდა, თუმცა საბოლოოდ, ბრალდება ნაწილობრივ აღიარა და დათანხმდა, სამართალდამცველებს 30,000 დოლარი გადაუხადოს, რაც მის ძებნაზე დაიხარჯა.
სასამართლოზე ბორგვარდტმა განაცხადა, რომ „ღრმად ნანობს თავის ქმედებებს“ და ბოდიში მოიხადა ოჯახისთვისა და მეგობრებისთვის მიყენებული ტკივილისთვის.
პროკურორის თქმით, ბორგვარდტმა სიცოცხლის დაზღვევა აიღო, პასპორტი განაახლა და ოპერაციაც კი ჩაიტარა, რათა მის მიერ ონლაინ გაცნობილ ქალთან ახალი ცხოვრება დაეწყო. გამომძიებლებთან საუბრისას მან განაცხადა, რომ უზბეკეთიდან ჩამოსულ ქალთან ერთად რამდენიმე დღე სასტუმროში გაატარა, სანამ საქართველოში დამკვიდრდებოდა.
„მთელი მისი ეგოისტური გეგმა ემყარებოდა იმას, რომ ტბაში დაღუპულიყო და თავისი სიკვდილი მსოფლიოსთვის „მიეყიდა,“ – განაცხადა პროკურორმა გერის ლასპისამ.
ბორგვარდტს 2024 წლის 12 აგვისტოს შემდეგ ეძებდნენ. მას შემდეგ, რაც 58-დღიანი უშედეგო ძებნის შემდეგ მისი ცხედარი ვერ იპოვეს, გამომძიებლებმა გამოარკვიეს, რომ ის გაუჩინარებამდე სამი თვით ადრე ახალი პასპორტით სარგებლობდა. ბორგვარდტი გამომძიებლებმა ნოემბერში იპოვეს და დაარწმუნეს, რომ აშშ-ში დაბრუნებულიყო. 22-წლიანი ქორწინების შემდეგ მისმა მეუღლემ განქორწინება მოითხოვა.
სისხლის სამართლის საჩივრის თანახმად, 2024 წლის 11 აგვისტოს ბორგვარდტმა 80 კილომეტრი გაიარა თავისი ოჯახის სახლიდან, უოტერტაუნიდან, გრინ-ლეიკისკენ. ღამით მან თავისი კაიაკი ტბაში ამოატრიალა, ნაპირზე კი გასაბერი ნავით გავიდა, რომელიც თან ჰქონდა. გზად, მან პირადობის დამადასტურებელი საბუთები ტბაში ჩაყარა და 112 კილომეტრი ელექტრონული ველოსიპედით მედისონამდე იარა. სისხლის სამართლის საჩივრის მიხედვით, იქიდან ის ავტობუსით ტორონტოში ჩავიდა, შემდეგ პარიზში გაფრინდა, მერე კი „აზიის ერთ-ერთ ქვეყანაში“, სანამ საბოლოოდ ევროპულ ქვეყანაში, საქართველოში არ დასახლდა.
საჩივრის თანახმად, მან გამომძიებლებს უთხრა, რომ ქალმა შეიფარა, რომელთანაც რამდენიმე დღე სასტუმროში გაატარა, სანამ საქართველოში დასახლდებოდა.
