სამხრეთ კორეის პარლამენტმა მიიღო საკანონმდებლო დადგენილება, რომლის თანახმადაც 2026 წლის მარტიდან საკლასო ოთახებში ტელეფონებისა თუ სხვა ციფრული მოწყობილობების გამოყენება მკაცრად აიკრძალება. აღსანიშნავია, რომ ინიციატივას მხარი საპარლამენტო პარტიების აბსოლუტურმა უმრავლესობამ დაუჭირა.
სამხრეთ კორეაში მიღებული გადაწყვეტილება მიზნად მოსწავლეებში სოციალურ მედიაზე დამოკიდებულების შემცირებას ისახავს. განათლების სამინისტროს მიერ ცოტა ხნის წინ ჩატარებულმა გამოკითხვამ ცხადყო, რომ თინეიჯერობის ასაკის მოსწავლეების 37%-ის ყოველდღიურობა საგრძნობლადაა დამოკიდებული სოციალურ მედიაზე. ამასთან, გაირკვა, რომ გამოკითხულთა 22%-ს მოწყობილობებთან კონტაქტის გაწყვეტის შემთხვევაში შფოთვა ეწყება.
აქვე უნდა ითქვას, რომ კანონი კონკრეტულ გამონაკლის შემთხვევებსაც ითვალისწინებს. ერთი მხრივ, საუბარია მხოლოდ იმ მოსწავლეებზე, რომლებსაც რაღაც სახის შეზღუდული შესაძლებლობა აქვთ და ციფრული მოწყობილობების გარეშე სასწავლო პროცესში სრულად ჩართვა არ შეუძლიათ. ხოლო, მეორე მხრივ, საუბარია ისეთ შემთხვევებზე, როცა ციფრული მოწყობილობის გამოყენება კონკრეტული სასწავლო მოდულითაა ნებადართული.
