ცნობილი ქუჩის მხატვრის, ბენქსის ახალი ნამუშევარი ლონდონში, სამეფო სასამართლოს შენობის კედელზე გამოჩნდა. გრაფიტი ასახავს მოსამართლეს ტრადიციული პარიკითა და მანტიით, რომელიც მიწაზე მწოლიარე მომიტინგეს სცემს. პროტესტანტის პლაკატი სისხლით არის მოსვრილი.
მიუხედავად იმისა, რომ ნამუშევარი არ უკავშირდება კონკრეტულ მოვლენას, ის გამოჩნდა მას შემდეგ, რაც ლონდონში 900-მდე ადამიანი დააკავეს ჯგუფ Palestine Action-ის მხარდამჭერი საპროტესტო აქციის დროს. პოლიციის განცხადებით, დაპატიმრებების უმეტესობა მას შემდეგ მოხდა, რაც აქცია ძალადობრივი გახდა.
სოციალურ ქსელებში გავრცელებული ფოტოების მიხედვით, ბენქსის ახალი ნამუშევარი პლასტმასის დიდი ფარებითა და ლითონის ღობეებით არის დაცული. მას პოლიცია იცავს და ვიდეოკამერების მეთვალყურეობის ქვეშაა.
ბენქსიმ ნამუშევრის ფოტო თავის ინსტაგრამზე გამოაქვეყნა, წარწერით „სამეფო სასამართლო. ლონდონი“. ამით ის ადასტურებს, რომ ნამუშევარი მისი ავტორობისაა.
ბენქსი ხშირად ქმნის გრაფიტებს პოლიტიკურ და სოციალურ თემებზე, როგორიცაა იმიგრაცია, ომი უკრაინაში, ბრექსიტი და უსახლკაროთა ცხოვრება. მხატვარი ინკოგნიტოდ რჩება და მისი ახალი ნამუშევრების შესახებ საზოგადოება სწორედ ინსტაგრამის პოსტებიდან იგებს.
