დონალდ ტრამპი გაერო-სგან გენერალურ ასამბლეაზე მისი გამოსვლის წინააღმდეგ „სამმაგი საბოტაჟის“ გამოძიებას ითხოვს.
როგორც აშშ-ის პრეზიდენტი Truth Social პლატფორმაზე წერს, ესკალატორი გაუმართავი იყო, როდესაც ის პირველ ლედისთან, მელანიასთან ერთად მოძრაობდა, ასევე, სუფლიორმა არ იმუშავა და მსოფლიო ლიდერებს მისი გამოსვლა არ ესმოდათ.
ტრამპის თქმით, ეს არა უბრალო დამთხვევა, არამედ „სამმაგი საბოტაჟი“ იყო.
„გუშინ გაერთიანებული ერების ორგანიზაციაში ნამდვილი სირცხვილი მოხდა – არა ერთი, არა ორი, არამედ სამი ძალიან საზარელი მოვლენა. პირველი, მთავარ სასაუბრო დარბაზში ასასვლელი ესკალატორი ხმაურით გაჩერდა. ის მომენტალურად გაჩერდა. საოცარია, რომ მელანია და მე ამ ფოლადის კიბეების ბასრ კიდეებზე წინ არ დავეცით. უბრალოდ, ორივეს მჭიდროდ გვეჭირა ხელი მოაჯირზე, თორემ კატასტროფა მოხდებოდა. ეს აბსოლუტური საბოტაჟი იყო, როგორც The London Times-ში ერთი დღით ადრე გამოქვეყნებულ „პოსტში“ იყო აღნიშნული, რომ გაერო-ს თანამშრომლები „ხუმრობდნენ ესკალატორის გამორთვაზე“.
ადამიანები, რომლებმაც ეს გააკეთეს, უნდა დააპატიმრონ. შემდეგ, როდესაც მთელი მსოფლიოს მასშტაბით მილიონობით ადამიანისა და დარბაზში მყოფი მნიშვნელოვანი ლიდერების წინაშე ვიდექი, ჩემი სუფლიორი არ მუშაობდა. ქვასავით ცივი, სიბნელე იყო. მაშინვე გავიფიქრე: „ვაუ, ჯერ ესკალატორის შემთხვევა და ახლა ცუდი სუფლიორი, რა ადგილია ეს?“.
ტელესუფლიორის გარეშე გამოსვლა დავიწყე, რაც დაახლოებით 15 წუთის შემდეგ დაიწყო. კარგი ამბავი ის არის, რომ გამოსვლას ფანტასტიკური შეფასებები მოჰყვა. შესაძლოა, მათ დააფასეს ის ფაქტი, რომ ძალიან ცოტა ადამიანს შეეძლო იმის გაკეთება, რაც მე გავაკეთე. და მესამე, გამოსვლის შემდეგ მითხრეს, რომ აუდიტორიაში, სადაც გამოსვლა იმართებოდა, ხმა საერთოდ გამორთული იყო და მსოფლიო ლიდერები, თუ თარჯიმნის ყურსასმენებს არ გამოიყენებდნენ, ვერაფერს გაიგებდნენ. გამოსვლის დასასრულს პირველი, ვინც დავინახე, მელანია იყო, რომელიც წინ იჯდა. ვკითხე: „როგორ მოგეწონა?“ მან კი მიპასუხა: „ვერცერთი სიტყვა ვერ გავიგე, რაც თქვი“. ეს დამთხვევა არ იყო, ეს გაერო-ში სამმაგი საბოტაჟი იყო. მათ უნდა რცხვენოდეთ საკუთარი თავის. ამ წერილის ასლს გენერალურ მდივანს ვუგზავნი და დაუყოვნებლივ გამოძიებას მოვითხოვ. გასაკვირი არ არის, რომ გაერთიანებული ერების ორგანიზაციამ ვერ შეძლო იმ სამუშაოს შესრულება, რისთვისაც ის შეიქმნა. ესკალატორზე ყველა უსაფრთხოების ჩანაწერი უნდა შეინახოს, განსაკუთრებით საგანგებო გაჩერების ღილაკი. საქმეში საიდუმლო სამსახურია ჩართული. გმადლობთ ამ საკითხისადმი თქვენი ყურადღებისთვის“, – წერს აშშ-ის პრეზიდენტი.
