დონალდ ტრამპმა 27 სექტემბერს, გვიან ღამით, თავის სოციალურ ქსელ Truth Social-ზე გამოაქვეყნა იდუმალი ვიდეო, რომელშიც “სასწაულმოქმედი მედბედები” (სამედიცინო საწოლები/კაფსულები) იყო აღწერილი. თუმცა, ვიდეო 28 სექტემბრის დილისთვის უკვე გაუჩინარებულიყო.
ხელოვნური ინტელექტის მიერ გენერირებულ ამ ვიდეოში, პრეზიდენტი ოვალურ კაბინეტში ზის და საზეიმოდ ჰპირდება თითოეულ ამერიკელს პერსონალურ ბარათს, რითაც მათ წვდომა ექნებათ ფანტასტიკურ სამედიცინო კაფსულებზე. ვიდეოს მიხედვით, ამ კაფსულებს თითქოსდა შეუძლიათ კიბოს განკურნება და დაკარგული კიდურების აღდგენაც კი.
ეს მითიური მოწყობილობები დიდი ხანია, რაც QAnon მოძრაობის მიმდევრების საყვარელი თემაა. ისინი დარწმუნებულნი არიან, რომ სამთავრობო ელიტები და სამხედროები საზოგადოებას განზრახ უმალავენ არამიწიერი წარმოშობის რევოლუციურ ტექნოლოგიას.
ხელოვნური ინტელექტის მიერ შექმნილი “სიუჟეტი” და Fox News-ის უარყოფა
ყალბ სიუჟეტში ასევე ჩართული იყო ტრამპის რძალი, ლარა ტრამპი, რომლის ხელოვნური ინტელექტის ორეული Fox News-ზე, რეალური გადაცემის სტილში, აღფრთოვანებით საუბრობდა “ჯანდაცვის ახალი სისტემის ისტორიულ გაშვებაზე”. ტელეარხმა დაუყოვნებლივ ოფიციალურად უარყო ინფორმაცია.
კალიფორნიის გუბერნატორმა, გევინ ნიუსომმა, არ დააყოვნა და პრეზიდენტის პუბლიკაციას “ხელოვნური ინტელექტის ნარჩენები” უწოდა და ტრამპი იმაში დაადანაშაულა, რომ ის “გაგიჟდა”.
აღსანიშნავია, რომ ინტერნეტში ნამდვილად არსებობს თაღლითური ვებსაიტები, რომლებიც “პლატინურ ბარათებს” ყიდიან არარსებულ მედბედებზე წვდომისთვის, ფასით $447-დან.
ინციდენტზე კომენტარი ჯერჯერობით არ გაუკეთებიათ არც თავად ტრამპს და არც მის წარმომადგენლებს.
