“ჩემში ეს იწვევს შეგრძნებას, რომ ის დრო დგება, როდესაც ხელისუფლებამ შეიძლება ადამიანს ნებისმიერი რამ დააბრალოს“,- ასე აფასებს ეკონომიკის ყოფილი მინისტრი გიორგი ქობულია საქართველოს ყოფილი პრემიერ-მინისტრის, “გახარია საქართველოსთვის“ ლიდერის, გიორგი გახარიას მიმართ სისხლისსამართლებრივი დევნის დაწყებას.
როგორც გიორგი ქობულიამ “პალიტრანიუსისა“ და რადიო “პალიტრას“ გადაცემაში “საქმე“ განაცხადა, მისი აზრით, ეს არა პოლიტიკური ანგარიშსწორება, არამედ ბიძინა ივანიშვილის პირადი წყენა შეიძლება იყოს.
“მე ამ ფაქტით, გუშინ რასაც მოვუსმინე, საკმაოდ შეშფოთებული და შეწუხებული ვარ. ეს გამოწვეულია არა იმით, რომ მე გახარიასთან ვთანამშრომლობდი, მერე დავშორდით და მე არანაირად არ გამოვდგები გახარიას დამცველად, არც ამის სურვილი არ მაქვს.
ჩემში ეს იწვევს შეგრძნებას, რომ ის დრო დგება, როდესაც ხელისუფლებამ შეიძლება ნებისმიერ ადამიანს ნებისმიერი რამ დააბრალოს. მე არ ვარ ამ საქმეში ჩახედული, მე გეუბნებით ჩემ შეგრძნებას, რომ ადამიანი, რომელმაც პარლამენტი დაიცვა თავის დროზე, 20 ივნისს, რომელიც გმირად იყო გამოცხადებული, დაწინაურდა პრემიერ-მინისტრის პოზიციაზე და თურმე, დღეს 13 წლით ციხეში უნდა გაუშვან იმიტომ, რომ თვალი დათხარა ხალხს.
ფაქტია, 6 წელის განმავლობაში თურმე გმირი იყო, ახლა არ ყოფილა. მეორე ბრალდებაში, ნუთუ დავიჯერებთ, რომ გახარია ადგა და საგუშაგოები ჩადგა იქ ყველას დაუკითხავად?! რთული დასაჯერებელია. არ ვიცი, სასამართლო განიხილავს.
ეს პოლიტიკური ანგარიშსწორებაც არ არის, გახარიას და მისი გუნდის რეიტინგი კი ვნახეთ, როგორ არის დაცემული, არ მგონია ის დიდად პოლიტიკურ მოწინააღმდეგეს წარმოადგენდეს. ეს ჩემში იწვევს იმის შეგრძნებას, რომ ეს არის პირადული, შეიძლება იგივე “ქართულ ოცნების“ ხელმძღვანელის ბიძინა ივანიშვილის წყენაზე აგებული ისტორია“,- განაცხადა გიორგი ქობულიამ.
