ჯონ ფიცჯერალდ კენედის შვილიშვილმა, ჯეკ შლოსბერგმა, დონალდ ტრამპის კაბინეტში მისი ბიძაშვილის, რობერტ ფ. კენედი უმცროსის, დანიშვნას მკაცრად აკრიტიკებს. შლოსბერგის თქმით, ტრამპი იმდენად შეპყრობილია კენედების ოჯახით, რომ „საბოლოოდ, კაბინეტში გალიაში ჩასვა ერთი ცოფიანი კენედი“.
პრეზიდენტ ჯონ კენედის და პირველი ლედი ჯეკი კენედის ერთადერთი შვილიშვილი, 32 წლის ჯეკ შლოსბერგი , საკუთარ შეხედულებებზე MS NOW-ის (ყოფილი MSNBC) პროგრამა “The Weekend”-ში ისაუბრა ჟურნალისტ ჯეკი ალემანისთან ინტერვიუში.
ალემანიმ შლოსბერგთან საუბარი სწორედ ტრამპის „შეპყრობილი“ ქცევის შესახებ წამოიწყო, რაც კენედის ოჯახსა და მათ მემკვიდრეობას უკავშირდება. ტრამპის ქმედებებს შორის დასახელდა: “JFK ფაილების” ნარჩენი ნაწილის გასაჯაროების გადაწყვეტილება; კენედის ცენტრის ფორმის შეცვლა; Air Force One-ის “ჯეკი კენედის ფერის” გაუქმება; კენედის ეპოქის ვარდების ბაღის გადაკეთება და იქვე მდებარე ჟაკლინ კენედის ბაღის (ბებიის სახელობის) დანგრევა.
ინტერვიუში შლოსბერგმა თავისი ბიძაშვილი, 71 წლის რობერტ ფ. კენედი უმცროსი , „ცოფიან“ (rabid) ცხოველს შეადარა, რომელიც ტრამპმა „გალიაში ჩასვა“.
ალემანიმ შლოსბერგს, რომელიც ახლახან ჩაერთო კონგრესის არჩევნებში ნიუ-იორკში, კონკრეტულად ჰკითხა: „თქვენი აზრით, რას ცდილობს ტრამპი აქ მიაღწიოს? და ეს ხომ არ ხდის თქვენს გადაწყვეტილებას კონგრესის ამ ადგილისთვის კენჭისყრაზე, კიდევ უფრო გადაუდებელს?“
„ჩემი ბაბუის, ჯონ ფ. კენედის, სამსახურის მემკვიდრეობა ჩემთვის დიდ მნიშვნელობას ატარებს. ის იყო ყველაზე ახალგაზრდა ადამიანი, რომელიც პრეზიდენტად აირჩიეს. მან გაგზავნა ადამიანი მთვარეზე. მისმა თეთრმა სახლმა მოამზადა სამოქალაქო უფლებების აქტი. და მე ვიცავ ამ მემკვიდრეობას“, — განაცხადა შლოსბერგმა.
