ჯეფრი ეპშტეინის პარტნიორი, ჟისლენ მაქსველი, ორშაბათს დაგეგმილ ჩვენების მიცემის პროცესში კითხვებზე პასუხის გაცემას არ აპირებს. ამის შესახებ ნათქვამია აშშ-ის წარმომადგენელთა პალატის წევრის, რო კანას მიერ კვირას გავრცელებულ წერილში.
მაქსველს, რომელიც 2021 წელს დამნაშავედ ცნეს ეპშტეინის მიერ არასრულწლოვანი გოგონების სექსუალურ ექსპლუატაციაში დახმარებისთვის და ამჟამად 20-წლიან სასჯელს იხდის, განზრახული აქვს გამოიყენოს აშშ-ის კონსტიტუციის მეხუთე შესწორება. ეს შესწორება პირს აძლევს უფლებას, საკუთარი თავის წინააღმდეგ ჩვენების მიცემაზე უარი თქვას. შესაბამისად, იგი არ აპირებს უპასუხოს არსებით კითხვებს, ნათქვამია რო კანას წერილში, რომელიც ზედამხედველობისა და სამთავრობო რეფორმების კომიტეტის თავმჯდომარეს, ჯეიმს კომერს გაეგზავნა.
მაქსველის ადვოკატს კვირას კომენტარის თხოვნაზე დაუყოვნებლივ არ უპასუხია.
კონგრესმენ კანას თქმით, ინდივიდუალურ კითხვებზე პასუხის გაცემის ნაცვლად, მაქსველი აპირებს ჩვენების დაწყებისას წინასწარ მომზადებული განცხადება წაიკითხოს. კანას არ დაუკონკრეტებია, საიდან ფლობს აღნიშნულ ინფორმაციას.
„ეს პოზიცია შეუსაბამოა მის ადრინდელ ქცევასთან, რადგან მას არ გამოუყენებია მეხუთე შესწორება, როდესაც ადრე გენერალური პროკურორის მოადგილეს, ტოდ ბლანშს შეხვდა იმავე საკითხების განსახილველად,“ – წერს კალიფორნიელი დემოკრატი კონგრესმენი თავის წერილში.
მაქსველის მიერ ჩვენების მიცემის პროცესი ემთხვევა აშშ-ის იუსტიციის დეპარტამენტის მიერ ეპშტეინის საქმესთან დაკავშირებული მილიონობით შიდა დოკუმენტის გასაჯაროებას.
