მექსიკის სამხედრო ძალებმა ჩაატარეს ოპერაცია, რომლის დროსაც ერთ-ერთი ყველაზე ძლიერი კარტელის, CJNG-ის ლიდერი დაიღუპა. ოპერაცია აშშ-ის „სადაზვერვო მხარდაჭერით“ განხორციელდა. ამის შესახებ თეთრი სახლის პრესსპიკერმა, კეროლაინ ლევიტმა სოციალურ ქსელ X-ში განაცხადა.
მისი თქმით, „ელ მენჩო“ ორივე ქვეყნისთვის „პრიორიტეტულ სამიზნეს“ წარმოადგენდა, როგორც აშშ-ში ფენტანილის ერთ-ერთი მთავარი მიმწოდებელი. ლევიტმა ასევე აღნიშნა, რომ პრეზიდენტმა ტრამპმა კარტელი CJNG მანამდე უცხოურ ტერორისტულ ორგანიზაციათა სიაში შეიყვანა.
„პრეზიდენტმა ტრამპმა ნათლად განაცხადა: აშშ მიაღწევს იმას, რომ ნარკოტერორისტებმა პასუხი აგონ. ტრამპის ადმინისტრაცია ასევე მადლიერებას გამოხატავს მექსიკელი სამხედროების მიმართ თანამშრომლობისთვის“, — დაწერა პრესსპიკერმა.
Washington Post და Reuters, პენტაგონის ანონიმურ წარმომადგენელზე დაყრდნობით, აზუსტებენ, რომ მექსიკელი სამხედროები მოქმედებდნენ „აშშ-მექსიკის ერთობლივ ოპერატიულ ჯგუფთან“ ერთად, რომელიც რეგულარულად თანამშრომლობს მეხიკოსთან აშშ-ის შეიარაღებული ძალების ჩრდილოეთ სარდლობის (NORTHCOM) მეშვეობით.
ხალისკოს შტატში ჩატარებული რეზონანსული ოპერაციის შედეგად, ჯამში კარტელის შვიდი წევრი იქნა მოკლული, ხოლო ორი — დაპატიმრებული. ამის შემდეგ ქუჩებში არეულობა დაიწყო, რომელიც რამდენიმე სხვა შტატსაც გადაედო. ხალისკოს გუბერნატორმა საგანგებო მდგომარეობა გამოაცხადა და მოსახლეობას სახლში დარჩენისკენ მოუწოდა.
