„ირანის შემდეგ ისრაელის გრანდიოზული გეგმებია რეგიონული ჰეგემონია და „ახლო აღმოსავლეთის ნატო““

ისრაელის მიზანია ირანის წინააღმდეგ ოპერაციის მეშვეობით ქვეყანაში ქაოსი დათესოს, რაც ხელს შეუწყობს სიტუაციის დესტაბილიზაციას თურქეთში, ერაყში, სპარსეთის ყურის მონარქიებსა და რეგიონის სხვა ქვეყნებში. ამის შესახებ გამოცემა «Лента.ру»-სთან ინტერვიუში ბრიტანელმა პოლიტოლოგმა და პროექტის „აშშ — ახლო აღმოსავლეთი“ პრეზიდენტმა, დანიელ ლევიმ განაცხადა.

„სინამდვილეში, ისრაელი ესწრაფვის სახელმწიფოებრივ კოლაფსს: ქაოსს, ფრაგმენტაციას და ირანის ფაქტობრივ ამოგდებას რეგიონული განტოლებიდან. ეს გამოიწვევს დესტაბილიზაციას ერაყში, თურქეთში, სპარსეთის ყურის ქვეყნებში, ასევე ავღანეთსა და პაკისტანში. ისრაელი საკმარისად შორს იმყოფება იმისთვის, რომ ისარგებლოს შედეგებით, სანამ მეზობელი ქვეყნები ქაოსის მდგომარეობაში იქნებიან“, — აღნიშნა მკვლევარმა.

ლევი ხაზს უსვამს, რომ ისრაელის „გრანდიოზული სტრატეგია“ რეგიონული ჰეგემონიის დამყარებას გულისხმობს — ისეთ მდგომარეობას, როდესაც ახლო აღმოსავლეთის ვერცერთი სახელმწიფო ვერ შეძლებს მის ლიდერობას დაუპირისპირდეს.

ექსპერტის თქმით, ირანთან კონფლიქტის შემდეგ თელ-ავივი შესაძლოა იმდენად გაძლიერდეს, რომ რეგიონში ნატოს ანალოგის შექმნა სცადოს. ისრაელი ღიად საუბრობს თავის ალიანსზე არაბთა გაერთიანებულ საამიროებთან, ინდოეთთან და ეთიოპიასთან. ისრაელმა შესაძლოა სპარსეთის ყურის დანარჩენი ნაწილიც ჩართოს — საუდის არაბეთი და კატარი, რომლებსაც ძალთა ახალი განლაგების მიღება მოუწევთ.

შეგახსენებთ, რომ 2024 წელს ისრაელის პრემიერ-მინისტრმა ბენიამინ ნეთანიაჰუმ აშშ-ს ახლო აღმოსავლეთში ნატოს მსგავსი ახალი ალიანსის შექმნა შესთავაზა. მთავრობის მეთაურმა დააზუსტა, რომ მსგავსი ბლოკი „ირანული საფრთხის“ წინააღმდეგ იქნება მიმართული. მან სიტუაცია მეორე მსოფლიო ომის შემდგომ ევროპას შეადარა, როდესაც აშშ-მ შექმნა უსაფრთხოების ალიანსი მზარდი საბჭოთა საფრთხის დასაპირისპირებლად.