„გაგზავნეთ ბარონი“: სოცქსელებში ტრამპის უმცროსი ვაჟის ახლო აღმოსავლეთში გაგზავნის მოთხოვნით შექმნილი მემები ვირუსული გახდა

ირანის წინააღმდეგ ამერიკული ოპერაციის დაწყებიდან ერთი კვირის თავზე, ჰეშთეგი #SendBarron სოციალურ ქსელებში ვირუსულად გავრცელდა. ათასობით მომხმარებელი მოითხოვს, რომ აშშ-ის პრეზიდენტის უმცროსი ვაჟი, 19 წლის ბარონი, საბრძოლო მოქმედებებში ჩაერთოს.

სამხედრო ფორმაში გამოწყობილი გიგანტური ბარონის გამოსახულება პოპულარულ მემად იქცა — ეს არის მინიშნება იმ მიზეზზე, რომელიც ახალგაზრდას ჯარში მსახურებაში უშლის ხელს. ბარონი, რომლის სიმაღლე 2.06 მეტრია, სამხედრო სამსახურისთვის ზედმეტად მაღლად ითვლება.

მემების ტალღას ბიძგი მისცა „სამხრეთის პარკის“ (South Park) ყოფილმა სცენარისტმა, ტობი მორტონმა. მან შექმნა სატირული ვებგვერდი, რომლის მთავარ გვერდზეც ვკითხულობთ: „ამერიკა ძლიერია, რადგან მისი ხელმძღვანელობაა ძლიერი. პრეზიდენტი ტრამპი ამას ყოველდღიურად ამტკიცებს. რა თქმა უნდა, მისი ვაჟი ბარონი სავსებით მზად არის დაიცვას ქვეყანა, რომელსაც მამამისი ასეთი სიმამაცით მართავს“.