„გზა უშენოდ“ – ბათუმის თანამედროვე ხელოვნების სივრცეში ნუცა დუჩიძის პერსონალური გამოფენა გაიმართა

ბათუმის თანამედროვე ხელოვნების სივრცეში მხატვარ ნუცა დუჩიძის პერსონალური გამოფენა „გზა უშენოდ“ გაიხსნა. ექსპოზიცია, რომელიც ორ განსხვავებულ სივრცეშია განთავსებული, ერთმანეთისგან სრულად განსხვავებულ სტილსა და ემოციებს აერთიანებს. ნამუშევრების ნაწილი სპეციალურად ამ გამოფენისთვის შეიქმნა და ავტორმა ისინი წლების წინ ტრაგიკულად დაღუპული მეუღლის, გენერალ გია გულუას ხსოვნას მიუძღვნა.

„ბათუმში ეს ჩემი მეორე პერსონალური გამოფენაა. ეს განსაკუთრებული ქალაქია, სადაც ძალიან აფასებენ ხელოვნებას, ამიტომ მინდოდა, სრულიად განსხვავებული სტილის ნახატები ჩამომეტანა. „გზა უშენოდ“ ასახავს იმ გზას, რისი გავლაც ქალს საყვარელი ადამიანის დაკარგვის შემდეგ უწევს. თუმცა, ექსპოზიციის მეორე ნაწილი ეთმობა ჩემს ფერად სამყაროს, რომელსაც გარშემომყოფებისთვის სიხარული და პოზიტიური აურა მოაქვს. მეუღლის ტრაგედიიდან 30 წელზე მეტი გავიდა და მსურდა, კიდევ ერთხელ გამეცოცხლებინა მისი სახელი. მადლობა მინდა გადავუხადო აჭარის კულტურის სამინისტროსა და თანამედროვე ხელოვნების სივრცის ხელმძღვანელობას ამ შესაძლებლობისთვის“, — აღნიშნავს ნუცა დუჩიძე.

ხელოვანის შემოქმედებით დაინტერესებულ პირებს გამოფენის დათვალიერება ბათუმის თანამედროვე ხელოვნების სივრცეში 25 ივნისამდე შეეძლებათ.

ჟურნალისტი თინა ფუტკარაძე