„საქართველოს ვუბრუნებთ ისტორიულ როლს დაკავშირებადობის კუთხით. დამოუკიდებლობის მოპოვებიდან, საქართველო ასეთი სუვერენული არასდროს ყოფილა – ჩვენი მოქალაქეების აბსოლუტური უმრავლესობა აღიქვამს სწორად იმას, რომ მშვიდობის და სტაბილურობის ერთადერთი გარანტი ამ ქვეყანაში არის „ქართული ოცნება“ ბიძინა ივანიშვილის ხელმძღვანელობით“

მინდა კიდევ ერთხელ გამოვყო უმნიშვნელოვანესი დღის წესრიგი, რომელიც დღეს დგას ჩვენი ქვეყნის წინაშე: ჩვენ საქართველოს ვუბრუნებთ ისტორიულ როლს დაკავშირებადობის კუთხით, – განაცხადა ფრაქცია „ქართული ოცნების“ თავმჯდომარის პირველმა მოადგილემ, ლევან მაჭავარიანმა, პარლამენტის პლენარულ სხდომაზე სიტყვით გამოსვლისას.

მან მიმოიხილა სხვადასხვა მიმდინარე ინფრასტრუქტურული პროექტი, როგორებიცაა ავტოსაგზაო მაგისტრალების მშენებლობა, აეროპორტების, პორტებისა და რკინიგზის განვითარება და აღნიშნა, რომ საქართველო იბრუნებს ისტორიულ ფუნქციას შუა დერეფანში დაკავშირებადობის კუთხით.

„შუა დერეფანში, სადაც ჩვენ ცენტრალურ ადგილს ვიკავებთ, ვავითარებთ ინფრასტრუქტურას იმისათვის, რომ ის ტვირთბრუნვა, რომელიც გათვალისწინებულია, რომ უნდა გაიზარდოს 15 მილიონი ტონიდან, უნდა გახდეს 25 მილიონი ტონა და კიდევ უფრო მეტი. შესაბამისად, ჩვენ ამ გაზრდილი ეკონომიკით, რა თქმა უნდა, ხელს ვუწყობთ ინფრასტრუქტურის განვითარებას. ეს არის ავტოსაგზაო მაგისტრალების მშენებლობა: აღმოსავლეთ-დასავლეთის მაგისტრალი, რომელიც 400 კილომეტრზე გრძელია და სადაც 300 კილომეტრზე მეტი უკვე დასრულებულია და მთლიანად დასრულდება 2030-2031 წლებისთვის. იგივე აეროპორტები, სადაც მიდის გაფართოება: თბილისის აეროპორტი, ქუთაისის აეროპორტი, ვაზიანის აეროპორტი, რომელიც დასრულებული იქნება 2032 წლისთვის, იგივე ახალი აეროპორტების მშენებლობა უშუალოდ მესტიაში, თელავში ახალი აეროპორტის მშენებლობა. ამასთანავე, ნუ დაგვავიწყდება საპორტო ინფრასტრუქტურის განვითარება. როდესაც ჩვენ ვსაუბრობდით ანაკლიის პორტზე, რომ ჩვენ თვითონ ავაშენებდით, ძალიან ბევრი კითხვის ნიშანი ჩნდებოდა, თუმცა უკვე მიმდინარეობს ძალიან აქტიური სამუშაოები და 2029 წლისთვის ანაკლიის პორტი უკვე პირველ გემებს მიიღებს. ნუ დაგვავიწყდება, რომ 1 მილიარდი ლარი იდება რკინიგზის მოდერნიზაციაში. და ეს ყველაფერი ვისთვის კეთდება? ჩვენთვის ხომ არ კეთდება? ეს ყველაფერი კეთდება ჩვენი შვილებისთვის, ჩვენი მომავალი თაობებისთვის. და კიდევ ერთხელ ხაზს ვუსვამ, რომ საქართველო იბრუნებს ისტორიულ ფუნქციას შუა დერეფანში დაკავშირებადობის კუთხით.” – განაცხადა მაჭავარიანმა.

მან ასევე აღნიშნა, რომ საქართველოს მოქალაქეების აბსოლუტური უმრავლესობა ხედავს, რომ მშვიდობისა და სტაბილურობის ერთადერთი გარანტი სწორედ მმართველი გუნდია ბიძინა ივანიშვილის ხელმძღვანელობით.

„ამასთანავე, მე მინდა ყველას შევახსენო, რომ ჩვენ ვართ 30-საუკუნოვანი უწყვეტი გენის ერი და რაც კი ჩვენს გენეტიკაში არის კოდირებული, აბსოლუტურად ყველაფერს უფრთხილდება ჩვენი ხელისუფლება: ჩვენს ტრადიციებს, ჩვენს კულტურას, ჩვენს იდენტობას, ჩვენს სარწმუნოებას. ჩვენ ვიცავთ ჩვენს მამულს, ჩვენს ენას და სარწმუნოებას. და ისიც ნურავის ნუ დაავიწყდება, რომ ასეთი სუვერენული, ასეთი დამოუკიდებელი საქართველო დამოუკიდებლობის მოპოვებიდან არასდროს ყოფილა და ყველა კარგად ხედავს, თუ როგორი შრომის და როგორი ბრძოლის ფასად გვიჯდება ეს ყველაფერი. ჩვენი მოქალაქეების აბსოლუტური უმრავლესობა აღიქვამს სწორად იმას, რომ მშვიდობის და სტაბილურობის ერთადერთი გარანტი ამ ქვეყანაში არის „ქართული ოცნება“ ბიძინა ივანიშვილის ხელმძღვანელობით.” – განაცხადა ლევან მაჭავარიანმა.