“ინფორმაცია გარდაცვლილთა შესახებ დაზუსტებული არ გვაქვს. მიმდინარეობს სამაშველო სამუშაოები, მაშინ როცა დავაზუსტებთ გარდაცვლილების თაობაზე, მოგახსენებთ. შესაძლოა იყოს გარდაცვალების ფაქტი, რაოდენობასთან დაკავშირებით არ შემიძლია წინასწარ ინფორმაცია მოგახსენოთ. სავარაუდოდ გარდაცვლილები არიან” – ამის შესახებ თბილისის პოლიციის დეპარტამენტის უფროსმა ვაჟა სირაძემ განაცხადა.
“შინაგან საქმეთა სამინისტროს მიერ, თბილისში, „სადგურის მოედნის“ მიმდებარე ტერიტორიაზე მდებარე ერთ-ერთ საცხოვრებელ კორპუსში მომხდარი ნგრევის შესახებ შეტყობინების მიღებისთანავე, მოხდა საგანგებო სიტუაციების მართვის სამსახურის მეხანძრე-მაშველებისა და საპოლიციო ძალების მობილიზება.
ადგილზე მისვლისთანავე, მეხანძრე-მაშველებმა ჩამონგრეული შენობის მიმდებარე ტერიტორიიდან მყისიერად განახორციელეს მოქალაქეების ევაკუაცია.
მიმდინარეობს ტერიტორიის ნანგრევებისგან გაწმენდა და აქტიური საძიებო-სამაშველო ღონისძიებები. ადგილზე იმყოფებიან სასწრაფო სამედიცინო დახმარების თანამშრომლები.
შინაგან საქმეთა სამინისტრო მოუწოდებს მოქალაქეებს, ასევე, ადგილზე მყოფ ყველა მედიასაშუალების წარმომადგენელს, დაემორჩილონ შინაგან საქმეთა სამინისტროს თანამშრომლების მითითებებს და დაიცვან უსაფრთხოების ნორმები. – ნათქვამია შსს-ს გავრცელებულ ინფორმაციაში.
