ნიუ-იორკის მერობის არჩევნებში გამოკითხვების ლიდერმა, 34 წლის დემოკრატმა ზოჰრან მამდანმა, სოციალურ ქსელებში გამოაქვეყნა ფოტო ბრუკლინელ იმამ სირაჯ ვაჰაჯთან ერთად. ამერიკის ხელისუფლება ვაჰაჯს ადრე 1993 წელს ნიუ-იორკში, მსოფლიო სავაჭრო ცენტრში მომხდარი ტერაქტის ხელშეწყობაში სდებდა ეჭვს.
მაშინ მიწისქვეშა პარკინგზე ასაფეთქებელი ნივთიერებით სავსე სატვირთო მანქანის აფეთქების შედეგად ექვსი ადამიანი დაიღუპა, ხოლო ათასზე მეტი დაშავდა. ვაჰაჯის სახელი საგამოძიებო დოკუმენტებში „ორგანიზატორების შესაძლო თანამზრახველად“ იყო მოხსენიებული, რომელთა შორის „ალ-ქაიდას“ ტერორისტებიც იყვნენ. თუმცა, მისთვის ბრალი არ წაუყენებიათ.
მამდანმა, რომელიც გამარჯვების შემთხვევაში ნიუ-იორკის პირველი მუსლიმი მმართველი გახდება, ფოტოს წარწერაში ვაჰაჯს „ქვეყნის ერთ-ერთი მთავარი ისლამური ლიდერი“ უწოდა. მამდანის პუბლიკაცია ძირითადად მემარჯვენე მედიასაშუალებებმა გააშუქეს. გაზეთმა New York Post-მა კი ვაჰაჯს „ტერორიზმის აპოლოგეტი“ უწოდა.
გაზეთმა ისიც შეახსენა მკითხველს, რომ ვაჰაჯის სამ ზრდასრულ შვილს 2018 წელს სამუდამო პატიმრობა მიესაჯა ნიუ-მექსიკოს შტატში ტერორისტების საბავშვო ბანაკის შექმნისთვის. თავად ვაჰაჯი კი ამტკიცებდა, რომ მან თავად მიიყვანა გამოძიება თავის შვილებზე, რომლებთანაც ურთიერთობა მათ დაპატიმრებამდე ცოტა ხნით ადრე შეწყვიტა.
