თუ 5–8 წლის წინ კრიპტოვალუტა ბევრისთვის მხოლოდ ექსპერიმენტად აღიქმებოდა, ბოლო წლებში დამოკიდებულება რადიკალურად შეიცვალა. დღეს იგი უკვე განიხილება როგორც ტექნოლოგიური და ფინანსური მომავლის მნიშვნელოვანი კომპონენტი.ამის შესახებ CryptoNews.ge-ის დამფუძნებელმა
გიორგი ქობალიამ info postalion-თან საუბრისას განაცხადა.
გიორგი ქობალიამ საქართველოში კრიპტოეკოსისტემის განვითარების შესაძლებლობებზე ისაუბრა.
– როგორ შეიცვალა კრიპტოვალუტისადმი დამოკიდებულება საქართველოში ბოლო წლებში და რა ფაქტორებმა გაზარდა მისი პოპულარობა?
გიორგი ქობალია: 5–8 წლის წინ კრიპტოვალუტა ბევრისთვის მხოლოდ ექსპერიმენტად აღიქმებოდა, ბოლო წლებში დამოკიდებულება რადიკალურად შეიცვალა. დღეს იგი უკვე განიხილება როგორც ტექნოლოგიური და ფინანსური მომავლის მნიშვნელოვანი კომპონენტი. საქართველოს მასშტაბით კრიპტოვალუტის პოპულარობის ზრდას რამდენიმე მიზეზი განაპირობებს. ერთ-ერთი მთავარი ფაქტორია ინფორმაციის ხელმისაწვდომობის ზრდა: მაშინ, როდესაც წარსულში უმეტესად უცხოურ წყაროებს ვეყრდნობოდით და შესაბამისი მასალის მოძიება რთული იყო, დღეს ქართულ ენაზე შექმნილი შინაარსი მნიშვნელოვნად გამრავალფეროვნდა და გამარტივდა ცოდნაზე წვდომაც.
ამასთანავე, გლობალურად იზრდება როგორც მოთხოვნა, ისე მიწოდება, რაც უშუალო გავლენას ახდენს კრიპტოვალუტების ღირებულებასა და ბაზრის დინამიკაზე. თუ ადრე კრიპტოვალუტა ხშირად ასოცირდებოდა გემბლინგთან ან კაზინოსთან, დღეს იგი უფრო მეტად განიხილება როგორც საინვესტიციო ინსტრუმენტი და ფინანსური განათლების განუყოფელი ნაწილი
2. რამდენად იყენებენ ქართველები კრიპტოვალუტას ყოველდღიურ ცხოვრებაში?
გიორგი ქობალია: – „ამ ეტაპზე საქართველოში კრიპტოვალუტა უფრო მეტად საინვესტიციო ინსტრუმენტად გვევლინება, ვიდრე ყოველდღიური გადახდის საშუალებად. მომხმარებლები კრიპტოაქტივებს ძირითადად იყენებენ ინვესტიციების განხორციელებისთვის, ტრეიდინგისთვის და საერთაშორისო გადარიცხვებისთვის.
აღსანიშნავია, რომ საქართველო ერთ-ერთ მოწინავე ქვეყანას წარმოადგენდა კრიპტომაინინგის მიმართულებით, რაც კრიპტოეკოსისტემისადმი ინტერესის აქტიური ზრდის მთავარი პროცესული სტიმული გახდა. მაინინგის მასშტაბურმა პრაქტიკამ მნიშვნელოვანი წვლილი შეიტანა როგორც საზოგადოებრივი ცნობიერების ამაღლებაში, ისე კრიპტოვალუტისადმი ნდობის ფორმირებაში. სწორედ მაინინგის სფეროში დაგროვებულმა გამოცდილებამ და ინტერესმა საფუძველი ჩაუყარა ჩემს პროფესიულ განვითარებას ბლოკჩეინის მიმართულებით, რაც საბოლოოდ გადაიქცა კრიპტონიუს პლატფორმის შექმნის იდეად და ქართული აუდიტორიისთვის ინფორმაციის ხელმისაწვდომობის საშუალებად.
დღევანდელი მდგომარეობით, კრიპტოვალუტა ჯერ კიდევ არ არის სრულად ინტეგრირებული ყოველდღიურ ეკონომიკურ საქმიანობაში, როგორც ეს განვითარებულ ქვეყნებში გვხვდება (მაგალითად, საცალო ვაჭრობაში, მომსახურების სფეროში და სხვა). მიუხედავად ამისა, მნიშვნელოვანია, რომ ამ მიმართულებით უკვე გადადგმულია ეტაპობრივი და მიზნობრივი ნაბიჯები, რაც მიუთითებს ინტეგრაციის პროცესის თანმიმდევრულ და დინამიურ განვითარებაზე.“
– რა ძირითადი რისკები და უარყოფითი მხარეები არსებობს კრიპტოვალუტის გამოყენებისას?
გიორგი ქობალია: – საინვესტიციო რისკების შეფასება, ინფორმირებული გადაწყვეტილებების მიღება და გრძელვადიანი სტრატეგიის შექმნა აუცილებელია ფინანსური უსაფრთხებისთვის. ამ სფეროში ცოდნის მუდმივი განახლება კრიტიკულად მნიშვნელოვანია, რადგან სწორედ ცოდნა უზრუნველყოფს სწორ და წარმატებულ ინვესტირებას. გარდა ამისა, კრიპტოსივრცეში არსებობენ თაღლითური პროექტები, რომლებიც ხშირად გემბლინგთან ასოცირდება, რის გამოც უსაფრთხოების მაღალი სტანდარტების დაცვა — საფულეების, პირადი გასაღებებისა და პლატფორმების ვალიდაცია — აუცილებელ მოთხოვნად რჩება.
– როგორ განვითარდება საქართველოს კრიპტო-ეკოსისტემა მომდევნო 3–5 წელში?
-მომდევნო 3–5 წელში საქართველოს კრიპტო-ეკოსისტემის განვითარება დიდი ხარისხით იქნება დამოკიდებული რეგულაციებზე, განათლებაზე და ციფრული ინფრასტრუქტურის ზრდაზე.
საქართველოს გეოპოლიტიკური მდებარეობა — ევროპასა და აზიას შორის — აძლევს ქვეყანას შესაძლებლობას ჩამოყალიბდეს რეგიონულ კრიპტო და Web3 ჰაბად. პოტენციალი მაღალია: ახალგაზრდების მზარდი ინტერესი, ტექნოლოგიური განათლების პროგრესი, ციფრული ტრანსფორმაცია და ქართულენოვანი რესურსების გაძლიერება (მაგ., CryptoNews.ge).
თუმცა, ბარიერებად რჩება რეგულაციების გაურკვევლობა, ფინანსური განათლების დაბალი დონე და ბანკებთან დაკავშირებული შეზღუდვები. თუ საქართველო აირჩევს “Education + Healthy regulation”-ის გზას, 3–5 წელიწადში კრიპტო–ეკოსისტემა ბევრად უფრო ორგანიზებული და ძლიერი იქნება.
თუ ეს საკითხები სწორად მოგვარდება, საქართველო რეალურად შეძლებს კრიპტოინოვაციების ცენტრად ჩამოყალიბებას და საერთაშორისო ინვესტორების მოზიდვას.
– რას ურჩევდით ადამიანს, ვინც ახლა იწყებს კრიპტოვალუტით დაინტერესებას?
გიორგი ქობალია: თუ ახლა იწყებთ კრიპტოვალუტით დაინტერესებას, პირველ რიგში მნიშვნელოვანია, შეისწავლოთ ბლოკჩეინის, ციფრული საფულეების და უსაფრთხოების საფუძვლები. ცოდნა ბაზრის მერყევობაში თავდაცვის საუკეთესო საშუალებაა. აუცილებლად გამოიყენეთ სანდო წყაროები და პლატფორმები და მოერიდეთ უცნობ პროექტებსა და დაპირებებს სწრაფ მოგებაზე.
ინვესტიციები დაიწყეთ მცირე მოცულობით — მხოლოდ იმ თანხით, რომლის დაკარგვაც არ დაგაზარალებთ. მეამაყება, რომ CryptoNews.ge არის პირველი ქართული პლატფორმა, რომელიც 2018 წლიდან ქართულ აუდიტორიას მსოფლიო კრიპტო სიახლეებს ქართულ ენაზე აწვდის და ამით მცირე, მაგრამ მნიშვნელოვანი წვლილი შეაქვს საქართველოს კრიპტოეკოსისტემის პოპულარიზაციაში. გახსოვდეთ, რომ ბაზარი ძალიან ცვალებადია, ამიტომ ემოციებზე დაყრდნობა ხშირად ცუდ შედეგამდე მიჰყავს. დაიწყეთ სტრატეგიულად, იყავით დისციპლინირებული და მიაქციეთ ყურადღება დივერსიფიკაციას — ნუ ჩადებთ ყველაფერს ერთ აქტივში.
ასევე, გათვალისწინეთ რეგულაციები და საგადასახადო ვალდებულებები — ქვეყნის კანონმდებლობა აუცილებლად უნდა იყოს თქვენი გადაწყვეტილებების ნაწილი. მოკლედ, სწავლა, უსაფრთხოება, სტრატეგია და მოთმინება წარმოადგენს მთავარ ფუნდამენტს, რომელიც ახალბედა ინვესტორს კრიპტოეკოსისტემაში წარმატებულად ეხმარება.
