ზურაბ ქადაგიძე გახარიას პარტიის წევრს: საუბრობთ პოლიტიკური განცხადებებით და ამიტომაც ვფიქრობ, რომ თქვენ მიერ ინიცირებული საკითხით მხოლოდ პოლიტიკური ქულის დაწერის სურვილი გაქვთ და არა საზოგადოების დახმარების

„იდეაში გეთანხმებით, მაგრამ მხარს რიგი მიზეზების გამო ვერ დავუჭერ,“ – განაცხადა საპარლამენტო პოლიტიკური ჯგუფის „ხალხის ძალის“ წევრმა, დეპუტატმა ზურაბ ქადაგიძემ ჯანმრთელობის დაცვისა და სოციალურ საკითხთა კომიტეტის სხდომაზე, სადაც ფრაქცია „საქართველოს“ წევრების ინიციატივით „საქართველოს შრომის კოდექსში“ და „საჯარო დაწესებულებაში შრომის ანაზღაურების შესახებ“ კანონებში ცვლილებები განიხილებოდა.

„იდეა [დაბალი ხელფასის მქონე პირთათვის ხელფასის ზრდა 1150 ლარამდე], რასაც თქვენ [გიორგი შარაშიძე] ამბობთ მომწონს და გეთანხმებით კიდეც, მაგრამ მისი განვითარების გზა არასწორია. მოგყავთ პოლონეთის მაგალითი და გათვალისწინებული არ გაქვთ როგორ დააზღვიეს რისკები, ან როგორ დაიწყეს საკითხის მოგვარება. ვფიქრობ, უკეთესი იქნება თუ ამ საკითხზე ფართომასშტაბიან მსჯელობაში შევალთ. პოლიტიკური მდგენელით შემოდიხართ ამ საკითხით და საუბრობთ პოლიტიკური განცხადებებით, ამიტომაც ვფიქრობ, რომ აღნიშნული საკითხით, მხოლოდ პოლიტიკური ქულის დაწერის სურვილი გაქვთ და არა საზოგადოების დახმარების თქვენს [გიორგი შარაშიძე] მიერ წარმოდგენილი საკითხზე, მთავარია იყოს სწორედ აწყობილი მოდელი და დარწმუნებული იყავით, არავის აქვს იმის კომპლექსი, არ წამოგყვეთ ბოლომდე ამ საკითხის გადაჭრაში, თუმცა კიდევ ვამბობ, იდეაში გეთანხმებით, მაგრამ საკითხს მხარს რიგი მიზეზების გამო ვერ დავუჭერ,“ – განაცხადა ზურაბ ქადაგიძემ.