საქართველოს პარლამენტში ინიცირებულ კანონპროექტს „შინაურ ბინადარ ცხოველთა შესახებ“ მოსახლეობაში არაერთგვაროვანი გამოხმაურებები მოჰყვა. ძაღლებისა და კატების მფლობელების დიდი ნაწილი ახალი შეზღუდვების დაწესებასა და ჯარიმების გაზრდას აპროტესტებს, თუმცა, მეორე ნაწილს მიაჩნია რომ ამ საკითხს დარეგულირება ნამდვილად სჭირდება.
განსაკუთრებული უკმაყოფილება კანონპროექტის იმ პუნქტმა გამოიწვია, რომელიც ძაღლისა და კატის სკოლებში, უნივერსიტეტებში, მაღაზიებში, აფთიაქებსა და კლინიკებში შეყვანის აკრძალვას ითვალისწინებს.
„ხმას რატომ არავინ ვიღებთ, კომენტარებში და სოცმედიაში რომ ძლიერები ვართ, გამოვიდეთ გავაპროტესტოთ და დავაშვებინოთ ძაღლები და კატები ყველგან!! ერთხელ და სამუდამოდ მოხდეს რაღაც ჩვენს სასიკეთოდ“, – წერს მოქალაქე თაკო ჯიმშელეიშვილი სოციალურ ქსელში.
შინაური ცხოველების მფლობელების უკმაყოფილებას ასევე იწვევს პუნქტი, რომელიც სამზე მეტი შინაური ბინადარი ცხოველის (ძაღლი, კატა) ყოლაზე ბინათმესაკუთრეთა უმრავლესობის თანხმობას ითვალისწინებს.
„ეს არის მარაზმი. ანუ მე, ორი ძაღლი, 10 წელს მიღწეული აკიშო და 6 წლის საი და ორი კატა, ორი წლის მიმი და სამი წლის ლუი (მიუსაფარი იყო და სახლში მოვიყვანე) რომ მყავს სახლში, რა უნდა ვქნა, ერთ-ერთი მათგანი ქუჩაში გავაგდო, თუ მონიტორინგის სამსახურს დავურეკო და გასაჩუქებლად, ქუჩაში გასაშვებად, თუ დასაძინებლად გავატანო? ან ჩემი კატები ვის რას უშავებენ, ან ჩემი ძაღლები? ან ჩემს მეზობლებს, რომელთაგან უმრავლესობას სადარბაზოში სისუფთავის დაცვის აუცილებლობას რომ ვერ შეაგნებინებ, რა უფლება აქვთ პრეტენზია განაცხადონ ჩემს სახლში მცხოვრები ცხოველების რაოდენობაზე? თუ რა თქმა უნდა, ისინი ღამის 23 საათიდან დილის 9 საათამდე ხმაურით დისკომფორტს არ უქმნიან, ან მთელი დღის განმავლობაშიც არაფერს აშავებენ, სადარბაზოს არ აბინძურებენ და ა.შ. რომელმა დებილებმა წარადგინეს ეს ინიციატივა? აზრს ვის დაეკითხნენ?“, – წერს ჟურნალისტი ეკა ლომიძე სოციალურ ქსელში.
თუმცა, საზოგადოების ნაწილი გარკვეული რეგულაციების გამკაცრებას ემხრობა. როგორც Newshub.ge-ს ჩიხუახუას ჯიშის შინაური ცხოველის, მაილოს მფლობელი ლანა მღებრიშვილი ეუბნება, შეზღუდვების მიუხედავად, დიდი ზომის ძაღლებს ქუჩებში საბელისა და ალიკაპის გარეშე დაჰყავთ.
„როდესაც ვხედავ, რომ პარკში აშვებული ძაღლები დარბიან, ჩემი ძაღლი იქ აღარ შემყავს – ეს ჩემი გადაწყვეტილებაა, მაგრამ როდესაც ქუჩაში, მოსახვევში სრულიად მოულოდნელად გვეფეთება უსაბელო ძაღლი, აქ უკვე ჩემს არჩევანზე არაა, მივუშვებ თუ არა მაილოს სხვა, დიდი ზომის ძაღლთან. ადრე, იყო შემთხვევა, როდესაც მასზე დიდი ძაღლი კაპიუშონში სწვდა, ტანზე რომ ეცვა, იმან გადაარჩინა. ამიტომ გამიხარდა, როდესაც გავიგე, რომ ღია სივრცეში საბელის ან ალიკაპის გარეშე გაყვანაზე ჯარიმა იზრდებოდა“, – ამბობს შინაური ცხოველის მფლობელი.
ამასთან, რეგულაციების იმ ნაწილს, რომელიც ცხოველების წამებასა და მათ მიმართ სასტიკ მოპყრობაზე არსებული კანონმდებლობის გამკაცრებას ითვალისწინებს, პოზიციურად უყურებენ როგორც შინაური ცხოველების მფლობელები, ასევე საზოგადოების სხვა წევრები.
„დღე არ გავა, ცხოველის ცემის ან წამების შესახებ არ გავიგო ტელევიზიით ან სოციალური ქსელით. ამ ხალხმა ერთხელ და სამუდამოდ უნდა შეიგნოს, რომ შინაური ცხოველისადმი უდიერი მოპყრობა, მით უმეტეს, წამება და მოკვლა დანაშაულია“, – ეუბნება Newshub.ge-ს 72 წლის ნანა ყურაშვილი.
პარლამენტში ინიცირებული ცვლილებები ასევე შეეხება კატებისა და ძაღლების გამრავლებისა და მეტისების კასტრაციის ახალი წესის დადგენას.
ცნობისთვის, საკანონმდებლო პაკეტის ინიციატორი პარლამენტის გარემოს დაცვის კომიტეტია და მას უმრავლესობის 24 დეპუტატი აწერს ხელს.
