უსაფრთხოების საბჭოს სხდომა, რომელზეც პუტინს ტრამპის რიტორიკის საპასუხოდ ბირთვული გამოცდების დაწყება შესთავაზეს, სერგეი ლავროვის გარეშე ჩატარდა. გამოცემა The Moscow Times-მა და ზოგიერთმა რუსულმა Telegram-არხმა დაწერეს, რომ 75 წლის მინისტრი, სავარაუდოდ, „არასასურველი გახდა“ ამერიკელ კოლეგასთან, მარკო რუბიოსთან, წარუმატებელი სატელეფონო საუბრის გამო.
ოქტომბერში ლავროვი და რუბიო ბუდაპეშტში პუტინისა და ტრამპის სამიტის ორგანიზებას განიხილავდნენ, თუმცა მათი საუბრიდან მალევე, თეთრმა სახლმა შეხვედრა განუსაზღვრელი ვადით გადადო. FT-ის ცნობით, დიპლომატების კონტაქტებმა „ტრამპზე შთაბეჭდილება არ მოახდინა“. ლავროვი და რუბიო, დაგეგმილის მიუხედავად, პირადადაც არ შეხვედრილან.
ტელეკომპანია CNN-მა კომენტარისთვის რუსეთის საგარეო საქმეთა სამინისტროს ოფიციალურ წარმომადგენელს, მარია ზახაროვას მიმართა. მან დაადასტურა, რომ ლავროვი რჩება მინისტრად და აღნიშნა, რომ ისეთი რამ, როგორიცაა სხდომაზე არყოფნა, „ხდება“.
თავის მხრივ, პუტინის პრეს-მდივანმა, დიმიტრი პესკოვმა განაცხადა, რომ ლავროვისა და პუტინის კონფლიქტის შესახებ ცნობები „სინამდვილეს არაფერი შეესაბამება“.
ამასთან, CNN-ის მიმომხილველმა ნეითან ჰოჯმა ივარაუდა, რომ კრემლი კონფლიქტის შესახებ საჯაროდ მაინც არ ისაუბრებდა.
„მაშინაც კი, თუ მოსკოვი სავარაუდო დიპლომატიური წარუმატებლობის შედეგებს განიცდის, კრემლი შიდა კონფლიქტების საზოგადოების თვალისგან შორს დაჭერას გეგმავს“, — აღნიშნა ჟურნალისტმა.
