ვაშინგტონი — აშშ-ის ვიცე-პრეზიდენტმა ჯეი დი ვენსმა დაადასტურა, რომ ორშაბათს მის კერძო რეზიდენციაში, ოჰაიოს შტატში, უცნობი პირი შეჭრას ცდილობდა. ინციდენტი ამერიკელი მაღალჩინოსნების წინააღმდეგ მიმართული თავდასხმების საგანგაშო სერიის გაგრძელებაა. ინფორმაციას Reuters ავრცელებს.
ვენსის განცხადებით, „შეშლილი ადამიანი“ მის სახლში შეღწევას ფანჯრებზე ჩაქუჩის დარტყმით ცდილობდა. ვიცე-პრეზიდენტმა სოციალურ ქსელ X-ში დაწერა, რომ შემთხვევის დროს ის და მისი ოჯახი ადგილზე არ იმყოფებოდნენ.
„ჩვენ სახლშიც კი არ ვიყავით, რადგან უკვე ვაშინგტონში ვიყავით დაბრუნებულები“, — დასძინა მან.
ვენსმა მედიას თხოვნით მიმართა, არ გამოაქვეყნონ მისი სახლის ფოტოები, რომლებზეც ჩამსხვრეული ფანჯრებში ჩანს. მან მადლობა გადაუხადა საიდუმლო სამსახურსა და ცინცინატის პოლიციას ოპერატიული რეაგირებისთვის. სამართალდამცავებმა ერთი ეჭვმიტანილი უკვე დააკავეს.
აშშ-ის საიდუმლო სამსახურს მომხდართან დაკავშირებით ოფიციალური კომენტარი ჯერჯერობით არ გაუკეთებია. გამოძიება გრძელდება იმის დასადგენად, იყო თუ არა თავდასხმა პოლიტიკური მოტივით ნაკარნახევი.
