მას შემდეგ, რაც დონალდ ტრამპმა განაცხადა, რომ ნობელის მშვიდობის პრემიის ლაურეატი მარია კორინა მაჩადო ნაკლებად სავარაუდოა, რომ ვენესუელას სათავეში ჩაუდგეს, ოპოზიციის ლიდერმა გამოთქვა მზადყოფნა, ეს ჯილდო აშშ-ის პრეზიდენტს გადასცეს. მაჩადოს განცხადება Fox News-ის ეთერში გავიდა.
„ეს [პრემიის გადაცემა] ჯერ არ მომხდარა, მაგრამ, რა თქმა უნდა, მინდა მქონდეს შესაძლებლობა პირადად ვუთხრა მას… რომ ეს ვენესუელელი ხალხის ჯილდოა, ჩვენ გვსურს ის მას გადავცეთ და მასთან ერთად გავიზიაროთ. ის, რაც მან გააკეთა, ისტორიულია“, — განაცხადა მაჩადომ Fox News-ის ეთერში, წამყვან შონ ჰენითისთან საუბრისას.
მაჩადომ ასევე აღიარა, რომ მას შემდეგ, რაც 2025 წლის ოქტომბერში პრემია მიენიჭა, მას ტრამპთან კომუნიკაცია არ ჰქონია.
მანამდე გამოცემა Washington Post-ი, თეთრი სახლის წყაროებზე დაყრდნობით, იტყობინებოდა, რომ სწორედ ნობელის პრემიის მიღება გახდა მაჩადოსთვის საბედისწერო, რადგან გავრცელებული ინფორმაციით, ტრამპი თავად იმედოვნებდა ამ ჯილდოს მიღებას.
მაჩადოს მიერ პრემიის მოპოვება ტრამპისთვის „მიუტევებელი ცოდვა“ აღმოჩნდა, რამაც ოპოზიციონერ ლიდერს ვენესუელის პრეზიდენტის პოსტის დაკავების შანსი დაუკარგა (აშშ-ის მხარდაჭერის კუთხით).
