რამ მიიყვანა ამ მდგომარეობამდე მოლდოვა, რომ პერსპექტივა არ გააჩნია გადარჩენის?, – განაცხადა პარლამენტის პირველმა ვიცე-სპიკერმა გიორგი ვოლსკიმ სუვერენიტეტის დათმობის საკითხთან დაკავშირებით მაია სანდუს განცხადებაზე საუბრისას. მისი თქმით, ამ თემაზე მძიმე პოლიტიკური შეფასებები უნდა გაკეთდეს.
„აბსოლუტურად წარმოუდგენელია ის, რომ სახელმწიფოს მეთაურს შეუძლია უარი თქვას თავისი ქვეყნის სუვერენიტეტზე. რუმინეთი და მოლდოვა ეთნიკურად ერთმანეთთან ახლოს არიან, თუ – არა, ეს მეორეხარისხოვანია; რა მიიყვანა ამ მდგომარეობამდე მოლდოვა, რომ პერსპექტივა არ გააჩნია გადარჩენის? მაია სანდუს განცხადება ნგრევის თავიდან არიდების ერთადერთ გზად არის წარმოსახული და აქედან გამომდინარეა ამ ვითარებაში ტრაგიზმი, მათ შორის, მძიმე პოლიტიკური შეფასებებიც გასაკეთებელია. რა გააკეთა ისეთი, რომ ასეთ მდგომარეობამდე მივიდა და ჩვენ რა არ გავაკეთეთ ისეთი, რომ ამ მდგომარეობამდე არ მივიდა საქართველო?“, – აღნიშნა ვოლსკიმ.
მოლდოვის პრემიერ-მინისტრმა ალექსანდრუ მუნტიანუმ განაცხადა, რომ ის, როგორც რიგითი მოქალაქე, რუმინეთთან გაერთიანების მომხრეა, თუმცა, როგორც მთავრობის თავმჯდომარე, ვალდებულია მოქალაქეების უმრავლესობის ხმას მიჰყვეს და ევროინტეგრაციაზე იმუშაოს.
მანამდე მოლდოვის პრეზიდენტმა მაია სანდუმ განაცხადა, რომ თუ რუმინეთთან გაერთიანების საკითხი ოდესმე რეფერენდუმზე დადგება, ის გაერთიანებას დაუჭერს მხარს. მისი თქმით, მოლდოვისთვის სულ უფრო რთული ხდება დამოუკიდებლად „გადარჩენა“.
სუვერენიტეტის დათმობის საკითხზე მოლდოველი დეპუტატი ქვეყნის პრეზიდენტს მწვავედ აკრიტიკებს. „იმედის კვირასთან“ ინტერვიუში ბოგდან ცერდიამ მაია სანდუ მიხეილ სააკაშვილსა და ვოლოდიმირ ზელენსკის შეადარა და თქვა, რომ ისინი არიან ჯაშუშების დესანტი უცხო სახელმწიფოდან. რუმინეთთან მოლდოვის გაერთიანებას დეპუტატი ეწინააღმდეგება.
