„მშვიდობის საბჭოს“ წესდების ხელმოწერიდან მალევე, აშშ-ის პრეზიდენტმა განაცხადა, რომ კანადა ამ ახალ ორგანიზაციაში აღარ არის მიწვეული.
„პატივცემულო პრემიერ-მინისტრო კარნი, დაე, ეს წერილი იყოს იმის დასტური, რომ მშვიდობის საბჭო აუქმებს თქვენს მიწვევას კანადის გაწევრიანებაზე ლიდერთა ყველაზე პრესტიჟულ საბჭოში, რომელიც კი ოდესმე შეკრებილა“, — დაწერა ტრამპმა Truth Social-ში.
როგორც Reuters-ი წერს, ტრამპმა ეს გადაწყვეტილება კარნის დავოსში გამოსვლის შემდეგ მიიღო, სადაც პრემიერმა დაგმო აშშ-ის მხრიდან სხვა ქვეყნებზე განხორციელებული ეკონომიკური ზეწოლა. კარნიმ ასევე განაცხადა, რომ „საშუალო ძალის“ სახელმწიფოები უნდა გაერთიანდნენ და არ ეცადონ აშშ-ის სიამოვნებას მხოლოდ საკუთარი გადარჩენისთვის.
გარდა ამისა, ერთი კვირით ადრე კარნი პეკინს ეწვია, სადაც ჩინეთი და კანადა ეკონომიკური კავშირების გაფართოებაზე შეთანხმდნენ ტრამპის მიერ დაწესებული ტარიფების ფონზე.
კანადა არ მოხვდა იმ ქვეყნების სიაში, რომლებმაც 21 იანვარს ხელი მოაწერეს მშვიდობის საბჭოს წესდებას. თუმცა, მანამდე კარნის ოფისმა გაავრცელა ინფორმაცია, რომ კანადამ მიიღო მიწვევა სტრუქტურაში გაწევრიანებაზე და აპირებდა მის მიღებას.
