მსოფლიო ეკონომიკა დიდი შტორმის მოლოდინშია. ეკონომისტმა პიტერ შიფმა, რომელმაც 2008 წლის გლობალური ფინანსური კრიზისი ზუსტად იწინასწარმეტყველა, Fox Business-ის ეთერში მორიგი საგანგაშო განცხადება გააკეთა.
მისი თქმით, ოქროსა და ვერცხლზე რეკორდული ფასები იმის ნიშანია, რომ აშშ-ის ეკონომიკას უმძიმესი დღეები ელის.
შიფის განმარტებით, ძვირფასი ლითონების ღირებულების ზრდა შემთხვევითი არ არის. ეს არის გლობალური ბაზრის პასუხი აშშ-ის მთავრობის უუნარობაზე, მართოს საკუთარი ფინანსები.
„ჩვენ მივდივართ დოლარის კრიზისისკენ. მომავალი ფინანსური რყევები 2008 წლის მოვლენებს კვირა დღის სასკოლო პიკნიკს დაამსგავსებს,“ — აცხადებს ექსპერტი.
ეკონომისტი მიიჩნევს, რომ ამერიკული ეკონომიკის საძირკველი მორყეულია. მისი არგუმენტები ასე გამოიყურება:
- კრედიტებზე დამოკიდებულება: აშშ-ის ეკონომიკა ზედმეტად არის აგებული სამომხმარებლო სესხებზე.
- დოლარის სტატუსის დაკარგვა: ამერიკული ვალუტა მსოფლიო სარეზერვო ვალუტის სტატუსს კარგავს.
- ცენტრალური ბანკების სტრატეგია: 2022 წლიდან მსოფლიოს ცენტრალურმა ბანკებმა ოქროს შესყიდვა გააორმაგეს, რაც იმის ნიშანია, რომ ისინი დოლარისგან დისტანცირებას ცდილობენ.
პროგნოზებს სტატისტიკაც ამყარებს: აშშ-ის დოლარის ინდექსი ბოლო ოთხი წლის მინიმუმამდე დაეცა. შიფი დარწმუნებულია, რომ ოქრო მალე დაიკავებს დოლარის ადგილს, რაც ამერიკულ ეკონომიკას მისი მთავარი საყრდენის გარეშე დატოვებს.
ეკონომისტის პროგნოზით, ეს მასშტაბური კრიზისი, შესაძლოა, მიმდინარე წლის ბოლოს ან მომავალი წლის დასაწყისში დაიწყოს.
