ეს სახუმარო თემაც აღარ არის. რაღაც ბოდვაშია გადასული, რომ რეალურად, მართლაც ერთ ბუმბულგაცვენილ თუთიყუშამდე ხომ არ დავალთ. ეს არის მათი სახე. ეს იყო ის ტყუილი, ის სიცარიელე, რომელიც ძალიან მალე, მოკლე დროში ჩამოიშალა, – განუცხადა საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ, ირაკლი კირცხალიამ ჟურნალისტებს „ქართული ოცნების“ გორგასლის ოფისში საპარლამენტო უმრავლესობის სხდომის დასრულების შემდეგ გამართულ ბრიფინგზე.
იგი გამოეხმაურა საია-ს ბრიფინგს, რომელზეც ცნობილი გახდა, რომ „წყლის ჭავლში შერეული ნივთიერებებით დაზიანებული“ მოქალაქეების სახელით, ორგანიზაცია სამართალწარმოებას იწყებს.
კითხვაზე, რა გახდა შეცვლილი ტერმინოლოგიის მიზეზი და რაზე მიანიშნებს აღნიშნული, კირცხალიამ აღნიშნა, რომ ეს არის თითქოსდა „კამიტით“ მოწამლული აქციის მონაწილეების მორიგი ბინძური და ცრუ კამპანია ხელისუფლების წინააღმდეგ. დეპუტატის თქმით, სამწუხაროდ, ამას თავის დროზე გარე პატრონების მხრიდან გამოხმაურება მოჰყვა. მან გაიხსენა BBC-ის რეპორტაჟი და პუბლიკაციები აღნიშნულ თემაზე.
„შევახსენებ ჩვენს საზოგადოებას, თუ რა დავა მიმდინარეობს BBC-თან დაკავშირებით. რაც შეეხება „კამიტს“, ძალიან კარგად იცოდნენ თავიდანვე – სიცრუეზე ვსაუბრობ, დიდ ბოროტებაზე და უტიფრობაზე, როდესაც შენი ქვეყნის მიმართ შეგიძლია მსგავსი ტყუილი გამოიგონო. რამდენიმე დღის წინ ეს სახუმარო თემა გახდა. უბრალოდ, ეს სახუმარო თემაც აღარ არის. რაღაც ბოდვაშია გადასული, რომ რეალურად, მართლაც ერთ ბუმბულგაცვენილ თუთიყუშამდე ხომ არ დავალთ. ეს არის მათი სახე. ეს იყო ის ტყუილი, ის სიცარიელე, რომელიც ძალიან მალე, მოკლე დროში ჩამოიშალა“, – აღნიშნა კირცხალიამ.
საია-ს ბრიფინგზე ცნობილი გახდა, რომ „საქართველოს ახალგაზრდა იურისტთა ასოციაცია“ წყლის ჭავლში შერეული ნივთიერებებით დაზიანებული მოქალაქეების სახელით, სამართალწარმოებას იწყებს და საქართველოს პროკურატურას შესაბამისი კომუნიკაციით მიმართავს, ხოლო ბრალდებები – „კამიტი“ და პირველი მსოფლიო ომის დროინდელი ქიმიური იარაღი სარჩელიდან გააქრეს.
