პოლონეთის მმართველ კოალიციაში შემავალი ცენტრისტული პარტია „პოლონეთი 2050“ რღვევას განიცდის. ინფორმაციას Politico ავრცელებს.
გამოცემის ცნობით, პარტიაში უთანხმოება იანვარში ლიდერის არჩევისას დაიწყო. გუშინ ცნობილი გახდა, რომ პოლიტიკური გაერთიანება პარლამენტის 15-მა დეპუტატმა დატოვა. პარტიას მოქმედი ლიდერის, ტელევარსკვლავის, შიმონ ჰოლოვნიას მემკვიდრე უნდა აერჩია.
დელეგატებმა „პოლონეთი 2050“-ის ახალ ლიდერად კატარჟინა პელჩინსკა-ნალენჩი აირჩიეს, თუმცა წაგებული მხარე შედეგებს არ დაეთანხმა და ახალი ხელმძღვანელობა კრიტიკის ჩახშობაში დაადანაშაულა.
Politico აღნიშნავს, რომ პოლონეთში მომავალ წელს საპარლამენტო არჩევნები უნდა ჩატარდეს. მიუხედავად იმისა, რომ „პოლონეთი 2050“-დან წასულმა დეპუტატებმა პირობა დადეს, რომ კოალიციის ლიდერს, პრემიერ-მინისტრს, დონალდ ტუსკს ბოლომდე უერთგულებენ, მმართველი კოალიციის მომავალი ბედი გაურკვეველი რჩება.
გამოცემის ცნობით, გამოკითხვებში ტუსკის პარტია „სამოქალაქო კოალიცია“ ლიდერობს, თუმცა მმართველ კოალიციაში შემავალი სხვა პარტიების რეიტინგი მკვეთრად დაცემულია. ასე, „პოლონეთი 2050“-ს 2% – 3%-იანი მხარდაჭერა აქვს, რაც მათ მომავალი მოწვევის პარლამენტში მოხვედრის შანსს უკარგავს.
