შეშლილი კენდის ოუენსი საფრანგეთის პატივსაცემ პირველ ლედის იმაში ადანაშაულებს, თითქოს ის მამაკაცია, მიუხედავად იმისა, რომ ეს სიმართლეს არ შეესაბამება. საერთოდ, საფრანგეთის პირველი ლედი ბევრად უფრო ლამაზია, ვიდრე კენდისი — დაწერა აშშ-ის პრეზიდენტმა პოდკასტის წამყვანზე, რომელსაც ემანუელ და ბრიჯიტ მაკრონებმა სასამართლოში შეთქმულების თეორიების გავრცელებისთვის უჩივლეს.
პრეზიდენტის უკმაყოფილება კენდის ოუენსმა იმით გამოიწვია, რომ ირანში ჩატარებული ოპერაცია გააკრიტიკა. ოუენსთან ერთად ტრამპმა სხვა კონსერვატორ ბლოგერებსა და ჟურნალისტებსაც შეუტია, რომლებიც „ეპიკური რისხვის“ წინააღმდეგ გამოვიდნენ. პრეზიდენტმა მათ სულელები და ხელმოცარულები უწოდა.
შეხედეთ მათ წარსულს. ყველა მათგანი ტელევიზიიდან გააგდეს, მათ დაკარგეს თავიანთი შოუები და ტელევიზიაში აღარც კი ეპატიჟებიან, რადგან ისინი არავის აინტერესებს. ეს ფსიქოპათები და შფოთისთავები მზად არიან ყველაფერი თქვან რეკლამის გულისთვის — აღნიშნა ტრამპმა Truth Social-ში.
კრიტიკა შეეხო ტაკერ კარლსონსაც — თავის ოდესღაც ერთგულ მომხრეს ტრამპმა ფსიქიატრთან მისვლა ურჩია. ბლოგერი ალექს ჯონსი კი, ტრამპის აზრით, გაკოტრებას იმსახურებდა. ხოლო კონგრესიდან წასულ მარჯორი ტეილორ გრინს პრეზიდენტმა კვლავ მოღალატე უწოდა.
