აშშ-ისა და ირანის დელეგაციები ისლამაბადში ჩავიდნენ, სადაც 11 აპრილს მათ შორის კონფლიქტის მშვიდობიანი მოგვარების შესახებ მოლაპარაკებები გაიმართება. CNN-ის ინფორმაციით, დიალოგი თავდაპირველად შუამავლების მეშვეობით დაიწყება, მოგვიანებით კი, დღის განმავლობაში, მხარეები პირდაპირ მოლაპარაკებებზე გადავლენ.
რა პოზიციები უკავიათ მხარეებს შეხვედრის წინ და რა შედეგის იმედი აქვთ მათ? აშშ-ის პრეზიდენტმა დონალდ ტრამპმა Truth Social-ში დაწერა, რომ ირანი არ იცავს ვაშინგტონთან მიღწეულ შეთანხმებას და „ცუდად ართმევს თავს“ ჰორმუზის სრუტეში ნავთობის გატარების საკითხს. მოგვიანებით, კიდევ ერთ პუბლიკაციაში, მან ირანის ხელმძღვანელობა „გამოძალვაში“ დაადანაშაულა და მოლაპარაკებებს „ერთადერთი მიზეზი“ უწოდა, რის გამოც ისინი „ჯერ კიდევ ცოცხლები არიან“.
მოლაპარაკებების დაწყებამდე ტრამპმა ჟურნალისტებს განუცხადა, რომ ჰორმუზის სრუტე ნებისმიერ შემთხვევაში გაიხსნება. მისი თქმით, სრუტის გახსნა შესაძლოა ავტომატურად მოხდეს ირანთან შეთანხმების მიღწევისას. აშშ-ის პრეზიდენტმა დაამატა, რომ ვაშინგტონის მთავარი მოთხოვნა ირანის მიერ ურანის გამდიდრებაზე სრული უარის თქმაა. WP-ი წყაროებზე დაყრდნობით ამტკიცებს, რომ ტრამპის ადმინისტრაცია ასევე მოითხოვს ირანის ციხეებში მყოფი ამერიკელების გათავისუფლებას.
თავის მხრივ, ირანის პარლამენტის სპიკერმა, მოჰამედ ბაღერ გალიბაფმა ხაზგასმით აღნიშნა, რომ მოლაპარაკებების დაწყებამდე ისრაელმა უნდა შეწყვიტოს დარტყმები ლიბანზე, ხოლო ირანის აქტივები უნდა განიბლოკოს. Axios-ის ინფორმაციით, საუბარია თეირანის კუთვნილ 6 მილიარდ დოლარზე, რომელიც ყატარის საბანკო ანგარიშზე ინახება. ტრამპმა, შესაძლოა, ნება დართოს ირანს, რომ ეს თანხა სურსათისა და მედიკამენტების შესაძენად გამოიყენოს.
The Wall Street Journal აღნიშნავს, რომ ირანს მოლაპარაკებებზე ძლიერი პოზიცია აქვს, რადგან ენერგეტიკულმა კრიზისმა შესაძლოა ტრამპს კომპრომისზე წასვლა აიძულოს. აშშ-სა და დანარჩენი მსოფლიოსგან განსხვავებით, ირანელ ლიდერებს შეუძლიათ თავს მოლაპარაკებების გაჭიანურების უფლება მისცენ და საკუთარ მოთხოვნებზე მტკიცედ იდგნენ
